Ka jingpynneh pynsah ïa ka jaitbynriew Khasi da kaba kheiñ jait shim jait tang naka kmie ka long kaba la jot lypa. Ka jingñiew beiñ ïa kiba ai jait kpa ka long ka jingsdang jong ka jingjot jingpra ka jaitbynriew. U kpa uba lah ba ïai bad uba ai symbai ka dei hok ban shim ïa ka jait jong u Kpa. Kito kiba ai jait kpa kim dei ban sngew kut lad hynrei ki dei ban ïaid shaphrang ïa ka lynti kaba dei bad jingkwah ba nylla jongphi.
Kaba ai jait kpa ka kham bha ban ïa kaba ai jait kmie haba ïa nujor bad kane ka rukom ai jait kheiñ jait tang sha ka kmie. Ha ka ai jait kpa ym don ka sdang ka ma kumba ki kynthoh ba lada ai jait sha u kpa kan wanrah ïa ka sang ka ma ki ong. Ban ong lei ba ka jingai jait kpa ka dei ka sang bad ka nongshun ïa ka jaitbynriew ka long kaei kaei kaba ktah mationg ïa baroh kawei ka jaitbynriew Khasi. Kiba ai jait kpa ruh ki don ki Pasan, ki Pakhynnah, ki ñiakha, ki Meikha, ki kparad kumba don kiba ai jait kmie, ki Meinah, ki Meisan, ki Kni, ki Mama, ki Meiieid, ki Paieid bad kiwei kiwei.
Ha ka jing-iohi jongnga kam don kano kano kaba bakla lada ngi ai jait sha u kpa ne sha ka ai jait kmie ruh. Ka ai jait kpa ruh ka dei ka rukom kaba la rim bha ha baroh ki jaitbynriew bapher bapher ha kylleng ka pyrthei. Balei ka long sang haba ai jait kpa ? Haba ki jaitbynriew kylleng ka pyrthei ki ai jait kpa, ki dei kiba long sang suda ? Bym long sang tang ma ngi ki Khasi ba ai jait kmie. Ka shongkha shongman ha kiba ai jait kpa ka bha bad ka skhem bun shah ban ïa kiba ai jait kmie. Namar ka ïa phet tnga ruh ka kham duna ha kiba ai jait kpa bad ka kit khunrei ruh ka duna ha kiba ai jait kpa ban ha kiba ai jait kmie.
Ngi dei ban pyrkhat bha na ka bynta ka lawei ka jaitbynriew ym ban shu ïa bud matlah tang ïa kane ka rukom ai jait sha ka kmie. Ngi dei ban ïehnoh ïa kaba sniew bad phai sha kaba bha, ym ban ïa kyrsum ktieh tang ha kawei ka pung.
C. B. Iawphniaw
