Ha kano kano ka jaitbynriew dei u symbai uba ioh lyngba ka shongkha shongman uba teh song bad pynlong ïa ka longbriew manbriew. U symbai um ju kylla rong haba ngi bet hapoh khyndew. Kum ka nuksa haba ngi bet ïa u symbai riewhadem un mih hi u riewhadem, ngi bet u symbai tyrso un mih hi u tyrso. Kumta ka long kumjuh ha ngi ki briew ruh haba ngi ioh symbai Negro, ki khun kum u kpa Negro, ngi ioh symbai Shaina ki khun ki long kum u kpa Shaina.
Kane ym dei ba nga ñiew beiñ ne kren beiñ ïano ïano. Hynrei ka long kaba shisha ha ka aiñ briew bad ka aiñ Blei kaba pynlong ïa ngi ki briew bad wan long briew lyngba u symbai. Ka Baibl ruh ka sakhi ba u symbai na u kpa ka hiar pateng la pateng ha ka longbriew manbriew. Bad ym dei na ka kynthei ne ka kmie ba ioh ïa ka longbriew manbriew. Ha ka jingshisha dei na u shynrang briew ngi ioh ïa ka longbriew manbriew. Ban ong ba ka jait ka kur ka dei na ka kynthei ka long kumba shu khot bym hok ïa kaba lieh ngi ñiew kaba ïong. Kumjuh haba ngi iohi tyng-kreiñ ba ki don ki longkmie ba ioh tnga ïa u para doh para snam, ki khun ba ioh na u kpa Khasi ki bit thok ïa ka dur ka dar u kpa Khasi ha ka rong snieh doh ruh. Hadien ba la iap u tnga Khasi, i ioh tnga biang sa ïa u khar Bihar bad i ioh khun biang.
Te kine ki khun ki da bit nadong shadong ka dur ka dar bad ka sniehdoh kum u kpa dkhar Bihari naduh khlieh haduh kjat. Te haba kumno ym dei u symbai uba hiar pateng ha ki khun. Hooid kajuh ka kmie hynrei ïapher ka rong ka sniehdoh jong ki khun na u kpa Khasi bad u kpa Bihari. Namar ka jaitbynriew jongngi kaba pdiang lang ïa baroh ki jaitbynriew, kumta ïa ki khun na ki kpa bym dei Khasi ruh ki ai jait shim jait jong ka kmie. Namar ha ka jaitbynriew Khasi kim ju kheiñ kor ïa u symbai ba ioh na u shynrang hynrei ki kham kheiñ kor ïa ka kmie ba pun ba kha. Kumta ngi ai jait sha ka kmie. Kane ym dei ba nga pynrem ïano ïano hynrei to wad ïa ka jingshisha phin sa sngewthuh ba pleng dei u symbai uba tehsong bad pynlong ïa ka longbriew jong-ngi ki jaitbynriew bapher bapher ha kylleng ka pyrthei.
C. B. Iawphniaw
