Tehran, Lber:
Ka nongpeitngor jong ka United Nations, ka tnat International Atomic Energy Agency, ka la ong ba kam shym la don kano kano ka jaka ha Iran kaba la shah ktah ha ki jinghiar thma liengsuin jong ka US bad ka Israel. Hynrei ka Iran, ka la kam ba kawei ka jaka, ka la shah pynjulor. U heh jong ka IAEA u la ong ba kam shym la don kano- kano ka dak ba ki jaka buh nuclear ha Iran ki la shah pynjulor ha ki jingshah thombor ha ki liengsuiñ ka US bad Israel. Hynrei u nongmihkhmat jong ka Iran sha ka IAEA, u la ong ba ka jaka ba kongsan jong ka ri nuclear, ka Natanz, ka la shah thombor.
Ha ka jingïalang ba kyrpang jong ka bor synshar jong ka tnat halor ka Iran, u heh jong ka IAEA u Rafael Grossi u la kyntu ïa baroh ki liang ban pyndonkam ïa ki lad kiba myntoi ban lait na ka jing kham jur shuh shuh jong kane ka jingïakynad. “Ha kaba ïadei bad ka jinglong jingman jong ki jaka buh nuclear ha Iran, haduh mynta, ngim don kano kano ka dak ba kino kino ki jaka buh nuclear, kynthup ïa ka Bushehr Nuclear Power Plant, ka Tehran Research Reactor, lane kiwei kiwei ki jaka pyndonkam nuclear fuel cycle, ki la shah pynjulor ne shah ktah,” u la ong.
U Grossi u la ong ba ka tnat ka dang pyrshang ban ïakynduh ïa ki bor pynïaid ïa ki nuclear jong ka Iran “hynrei kam shym la don kano kano ka jubab tad haduh mynta”.
U Reza Najafi, uba dei u nongmihkhmat jong ka Iran sha ka IAEA, u la ïathuh ba ki liengsuiñ ka Israel bad US ki la leit thombor ia ka shlem nuclear kaba don hapoh Natanz bad u la bynrap ba ka jingkynnoh jong ka US ba ka Iran ka pyrshang ban don ia u bom nuclear ka dei tang ka jingpynrem ban ioh daw ban wan hiar thma ia ka Iran.
U Grossi u la ong ba ka jinglong jingman jong ka jingïakynad ha ka thaiñ Mihngi ka long kaba sngewkhia haduh katta. “Ka Iran bad bun kiwei pat ki ri ha ka thaiñ kiba la shah thombor ha ki shipai ki don ïa ki jaka pynmih bor ding nuclear kiba treikam bad ki jaka wad bniah nuclear bad kumjuh ruh ki jaka kynshew umphniang kiba ïadei bad kane, kaba la nang wanrah shuh-shuh ia ka jingma ïa ka jingshngaiñ jong ki shlem nuclear,” u la ong, da kaba bynrap ba ka jingïakren hapdeng kine ki ri kiba iadon bynta ha kane ka jingiakynad, ka dei ban sdang biang noh shen khlem da buh-teng ne pynslem shuh.
