New Delhi, Lber:
U Myntri Rangbah-duh ka ri India, u Narendra Modi, ha ka jingïakren bad u Myntri Rangbahduh ka Israel- u Benjamin Netanyahu, u la pynpaw ïa ka jingsngewkhia kaba jur halor ka jinglong- jingman ha kane ka pyrthei ba mynta bad kumta ruh u la ai jingmut ïa utei u nongïalam ka ri Israel ba un kham pyrkhat nyngkong eh shwa ïa ka mynsiem jong kito ki paidbah nongshong shnong ba lui-lui, la ka long ha kano- kano ruh ka ri ba ka Israel ka leit ban thombor.
U PM Modi u la pynpaw biang ruh “Ka jingdonkam ban pynsangeh noh kloi ïa ki jingïaleh pyrshah.”
Ha ka jingthoh halor ka rynsan ‘X’, u Myntri Rangbahduh ka India u la ong ba u la pynlong ïa ka jingïakren lyngba ka telephone bad u Netanyahu bad u la pynpaw ïa ka jingsngewkhia jong ka India halor ki jingjia ba dang shen bad u la pynksan ïa ka jingshngain jong ki riew paidbah kum ka mat ba hakhmat eh.
“La ioh lad ban ïakren ha ka telephone bad u PM Benjamin Netanyahu ban ïakren ïa ka jinglong jingman ha kane ka thain mynta. La pynsngew ïa ka jingsngewkhia jong ka India halor ki jingjia ba dang shen bad la pynksan ïa ka jingshngain jong ki riew paidbah kum ka jingthmu ba kongsan. Ka India ka pynpaw biang ïa ka jingdonkam ban sangeh noh kloi ïa ki jingialeh pyrshah,” la ong u Myntri Rangbahduh ka ri.
Ha ka jingthoh kaba hadien, u la bynrap, “Nga la ïakren lyngba ka phone bad u Myntri Rangbahduh u Benjamin Netanyahu ban ïakren ïa ka jinglong jingman ha ka thain mynta. Nga la pynpaw ïa ka jingsngewkhia jong ka India ha kaba ïadei bad ki jingjia ba dang shen bad nga la pynksan ba ka jingshngain jong ki nongshong shnong ka dei kaba kongsan tam. Ka India ka pynpaw biang ïa ka jingdonkam ban pynbeit kloi.”
Shuh shuh, u PM Modi u la ong ruh ba u la ïakren bad u President ka United Arab Emirates u Sheikh Mohamed bin Zayed Al Nahyan, bad u la pynrem jur ïa ki jingthombor ba dang shen ïa ka UAE, da kaba pynpaw ïa ka jingsngewlem halor ka jingduh ei ki mynsiem briew.
Ha ka jingthoh halor ka rynsan ‘X’, u Myntri Rangbahduh u la ong ba u pynsngew ïa ka jingïatylli jong ka India bad ka UAE.
“La ïakren bad u President ka UAE, u hynmen jong nga u Sheikh Mohamed bin Zayed Al Nahyan. U la pynrem jur ïa ki jingshah thombor ha UAE bad u la sngewlem ïa ka jingduh noh ïa ki mynsiem briew ha kine ki jingshah thombor. Ka India ka ieng ha ka jingïatylli bad ka UAE ha kine ki por kiba eh. ka jingshngain bad ka jingshong shngain.”
Kane ka jingïakren ka wan hapdeng ka jingjur ka jingkulmar hadien ka jingsiat namding lang kaba la ai kyrteng ka Operation Roaring Lion/Operation Epic Fury da ka Israel bad ka America ïa ka Iran ha ka 28 tarik u Rymphang.
U President ka America, u Donald Trump bad ki lad pathai khubor jong ka Iran, ki la pynthikna ba u nongialam ba hakhlieh duh jong ka Iran, u Ayatollah Ali Khamenei, ula shah pyniap ha ka 28tarik u Rymphang, ki jinghiar thma jong ka US bad Israel, kaba la pyniap ia utei u nongialam jong ka Iran, ha ryngkat ka khun kynthei, u khun ksiew, ka ksiew, bad u ksiew jongu.
