Aizawl, Lber:
U K Sapdanga ha ka 2 tarik u Lber u la pyntip sha ka ïingdorbar jong ka jylla ba ki don ki phetwir kiba leit rieh tngen ha Mizoram kiba la lap ba ki leh ïa ki kam khaïi beaiñ, ha kaba ki katto katne ki riew shimet ki la ïakynduh lypa ïa ki jingshah pynngat ha ki kyndon aiñ kiba jur.
Haba jubab ha ka jingïalang mang tyngka kaba dang ïaid shakhmat, u Sapdanga u la pynpaw ba watla ka sorkar kam pat ïoh ïa ki kaiphod ba thikna shaphang ki jingpynkheiñ aiñ kiba heh, hynrei ka don ka jingtip kaba lah ban ngeit ba kawei ka bynta jong ki nongphetwir ka la pynlong ïa ki kam rit kam ria kiba long pyrshah ïa ka aiñ.
Ki bor synshar ki dang tohkit bniah ïa kine ki kam, bad ha ki katto katne ki khep, ki briew shimet ki ïakynduh ïa ki jingshah pynngat katkum ka jinglong jong ki mar kiba donkti.
Haba ai jingtip kaba thymmai halor ka jingpynrung kyrteng da ka Biometric, u Myntri u la ong ba ki don 26,381 ngut ki phetwir na Myanmar kiba la pynrung kyrteng haduh ka 5 tarik, Rymphang, katba 1,974 ngut ki dang hap ban pyndep ïa ka jingpynrung kyrteng.
Mynta ka Mizoram ka pdiang ïa palat 38,000 ngut ki phetwir na Myanmar bad Bangladesh, nalor ki briew kiba la phetwir hapoh ka ri na Manipur. Kiba bun ki nong Myanmar ki dei na ka jaitbynriew Chin, kaba don ka jingïadei jaitbynriew bad ki Mizo.
Ki nongphetwir na Bangladesh kiba bun ki dei kiba wan na ka thaiñ Chittagong Hill Tracts, katba ki dkhot jong ka jaitbynriew Kuki-Zomi-Hmar na Manipur ki la poi hadien ka jingïakynad hapdeng ki jaidbynriew kaba la jia ha u Jymmang, 2023.
U Sapdanga u la ong ba watla ka sorkar ka la tyrwa ïa ki jaka ai jingïarap ne ki jaka sah ba la buh kyrpang hynrei ka jingpyntreikam ka long kaba eh.
U la kdew ba ki nongphetwir ki don kylleng ka jylla bad kim lah ban sah ha kawei ka jaka man ka por namar ki jingeh ha ka kamai kajih.
U Myntri u la pynpaw biang ba katba ka Mizoram ka dang bteng ban ai jingkyrshan ïa ki briew, baroh ki nongshong shnong kynthup ïa ki nongphetwir ki dei ban bud ryntih ïa ka aiñ.
