New Delhi, Lber:
Ki la don kumba 260 ngut ki briew na Maharashtra kiba dang sahkut ha Middle East namar ka jingkhang ki lynti suiñ hadien ba la mih ka jingïakynad ha Iran, wat la baroh la ïathuh ba ki don ha ka jingshngaiñ, la ïathuh ka lad phah khubor, da kaba sot ïa ki jingkren jong ki heh sorkar ha ka lah sngi U Blei.
Ki jinglum jingkheiñ halor ka jingdon jong ki briew kiba dang sahkut lynti kiba na kane ka thaiñ ki dang ïaid shakhmat.
Napdeng kito kiba sahkut ha Dubai, u dei u dkhot jong ka Lok Sabha na ka seng Congress na Jalna u Kalyan Kale, uba la leit jingleit ha ka sngi Thohdieng, shisngi shwa ban hiar thma ka US bad Israel ïa ka Iran, ong u hynmen jong u, u Jagannath Kale.
Une u MP, u dei ban wanphai lyngba ka Abu Dhabi, ha ka sngi Ba-ar, hynrei mynta, u sahkut ha Dubai, namar ba ki liengsuiñ, ki shah pynsangeh treikam, ong ka tyllong khubor.
“U don ha ka jingshngaiñ bad kam don eiei ban khuslai ei ei shaphang jong u”, la bynrap shuh shuh u Jagannath Kale.
Ki khyndai ngut kiwei pat ki nongjngohkai pyrthei na Jalna ruh ki sahkut ha Dubai bad Abu Dhabi, ki ar tylli ki jaka khaïi kiba heh tam jong ka United Arab Emirates, ong ka khubor, da kaba sot ïa ki jingkren jong ki heh sorkar.
Na Pune, ki la don 84 ngut ki samla pule bad saw ngut ki Professor jong ka Indira Institute of School of Business ha Pimpri Chinchwad, kiba la poi sha Dubai na ka bynta ka ‘Global Immersion Programme’, ki dang sahkut, ryngkat bad ki 10 ngut ki nongjngohkai pyrthei na Ganesh Peth, la bynrap uwei u heh sorkar.
Ki don 61 ngut ki briew na Marathwada, kiba sahkut ha Dubai, Bahrain, Qatar, bad Abu Dhabi, na ka daw jong ka jingkhang ka lynti suiñ, hadien ka jinghiar thma jong ka US-Israel, ïa ka Iran, ong u heh jong katei ka Division.
Kine ki kynthup ïa ki nongjngohkai pyrthei, don kiba trei ha Gulf, bad kiwei pat kiba don ïa ki visa kum ki nongshong shnong.
“Ki jingtip ba bniah na Dharashiv distrik kim pat poi satia. Ka Nanded ka lamkhmat da ki 24 ngut, bud sa 12 ngut na Latur, 10 ngut na Beed, 6 ngut na Parbhani bad Jalna, 2 ngut na Chhatrapati Sambhajinagar, bad uwei na Hingoli”, la ong u heh sorkar.
Ha Thane, 23 ngut ki nongjngohkai pyrthei na Shahapur kiba la leit sha ka Package Tour bad kiba la thmu ban wanphai biang ha ka 28 tarik u Rymphang, mynta ki sahkut hadien ba ka jingïakynad ka la pynthut ïa ki jingleit jingwan jong ki liengsuiñ, la ïathuh ki bor pynïaid.
Kumjuh ruh ki don 50 ngut ki briew na Solapur bad 83 ngut ki nongjngohkai pyrthei na Kolhapur kiba dang sahkut ha ka thaiñ Middle East, ong ka khubor jong ka Local Tours and Travel Association.
Uwei u samla pule na Raigad uba pule ha kawei ka kolej Management ha Dubai International Academic City bad uwei u nongkhaïi na Dhule ruh ki sahkut shabar ri.
Ki bor synshar ha ki distrik Thane bad Palghar ki la pyntreikam ïa ki lad ki lynti bad ki la pynmih ïa ki jingai jingmut ban ïarap ïa kito kiba sahkut ha Gulf, la ong ki heh sorkar.
Ha ki jingpynbna, u Thane Collector u Shrikrishna Panchal bad u Palghar Collector u Indu Rani Jakhar ki la kyntu ïa ki longïing jong ki nongshong shnong kiba sahkut ba kin ïai ïakynduh bad ki lad ba thikna bad ban ai ïa ki jingtip ba bniah sha ki District Disaster Management Cell na ka bynta ka jingïatreilang kaba ïaid beit ïaid ryntih bad ki Embassy jong ka ri India.
Hapdeng ka jingjur jong ka jingkulmar ha West Asia, ka sorkar pdeng ka la ong ha ka lah sngi U Blei ba ka dang ïakynduh bad ki Mission jong ka India ha ka Gulf ban pynthikna ïa ka jingwanphai biang jong ki trai ri da kaba suk. Ka Cabinet Committee on Security (CCS), ba la pynïaid da u Myntri Rangbahduh ka ri, u Narendra Modi, ka la pynpaw ïa ka jingsngewkhia halor ka jingshngaiñ jong ki nong India kiba bun kiba sahkut ha kane ka thaiñ bad ka la bthah ïa baroh ki tnad ban shim ïa ki lad ki lynti ban ïarap ïa ki trai ri kiba shah ktah.
U Myntri ka sorkar pdeng u Pralhad Joshi u la ong ba ka sorkar pdeng ka la pynkhreh pura ban wanrah biang ïa ki nong India kiba sahkut ha Gulf bad ka dang ïatreilang bad ki Mission jong ka ri India kiba don sha bar ri.
Ka jingleit jingwan jong ki liengsuiñ, ka la sahkut naduh ka sngi Saitjaiñ, hadien ka jinghiar thma lang jong ka US bad ka Israel, ïa ka Iran, kaba la wanrah ïa ka jingïap jong u nongïalam baha khlieh duh jong ka Iran, u Ali Khamenei.
Hadien ka jingshah thombor pynrem jong ka Iran ïa ki jaka sah jong ka US ha ki katto katne ki ri jong ka Gulf, ki kompeni liengsuiñ ki la pynsangeh noh ïa ki jingshakri ki liengsuiñ naba la khang ïa ki lynti suiñ.
