Mumbai, Lber:
Ka jinglait stet jong ka Oleum Gas kaba shyrkhei ha kawei ka Chemical Unit ha Palghar distrik jong ka Maharashtra ha ka lah sngi U Blei ka la pynlong ïa palat 2,600 ngut ki briew ban kynriah jaka sah, kynthup ïa ki 1,600 ngut ki khynnah skul, katba lai ngut ki briew ki la ujor ïa ka jingshitom bad dait ki khmat, ong ki heh sorkar.
Ka jinglait jong ka Oleum Gas (fuming sulphuric acid) ka la ktah ïa ki jaka kiba don ha ka jingjngai kaba san kilomitar jong ka unit ha ka Boisar MIDC kaba don sha bar jong ka Mumbai bad ka la pynlong ïa ki heh ba dei khmih ba kin pynkynriah jaka kham kloi ïa ki nongshong shnong kum ka lad jingïada, ki la ong.
Kane ka jinglait jong ka Gas, kaba la jia ha ka por 2 baje eiei ha ka unit jong ka Bhageria Industries Ltd, ka la thaw ïa ka jinglynguh kum u Lyoh ba rben jong ki tdem lieh kiba la saphriang sted namar ka jingbeh jong ka lyer, kaba la wanrah ïa ka jingsyier ha ki nongshong shnong bad ki nongtrei kiba don ha katei ka bynta jong ka karkhana.
Ïa ka daw jong ka jinglait jong ka Gas ym shym la lah ban tip bha haduh mynta.U Dr Indu Rani Jakhar uba dang buddien hi dalade ïa kane ka jingjia, u la ong ba la pyntreikam mardor ïa ka Disaster Management Plan.
“Ka jinglait jong kane ka Gas ka la jia na ka tank Oleum kaba ngiam ban thep 2,500 litar. Namar ka jingwan jong ka lyer, ka Gas ba lait ka la saphriang sha ki jaka ba marjan, kaba la ktah ha ka jingjngai kaba kumba 5 kilomitar,” la ong ka bor synshar ha ka jingpynbna ha ki lad pathai khubor.
Kum ka lad jingïada, ki bor pynïaid ki la hukum ban pynkynriah noh mardor ïa ki 1,600 ngut ki khynnah skul na kawei ka skul ba don ha katei ka thaiñ, ka Tarapur Vidyamandir. Nalor kata, palat 1,000 ngut ki nongtrei na ka Bhageria Industries bad ki kompeni ba marjan la pynkynriah sha ki jaka ba shngaiñ, la pyntip ka lad phah khubor.
Ki kynhun na ka National Disaster Response Force (NDRF), ka Bhabha Atomic Research Center (BARC), bad ka kynhun pynlip ding ha kaba sdang ki la ïakynduh jingeh ban poi sha ka unit ba la jia ka jinglait jong ka Gas.
“Namar ka jingbun jong ka tdem ba la lynguh ha ki jaka ba shah ktah, ki kynhun ai jingïarap ki la ïakynduh jingeh ban poi sha ka jaka ba thikna jong ka jingheh ka tdem,” la ïathuh shuh shuh ka jingpynbna.
Ki riew shemphang ba la tip bniah ïa ki jait dawai bad ki pulit jong ka NDRF ha kaba kut ki la lap ïa ka jaka ba la lait bad ki la rung shapoh katei ka jaka da kaba pyndonkam ïa ki Self-Contained Breathing Apparatus (SCBA). Ban khanglad ïa ka jingmih jong ka Gas, ki nongkhmih bniah, ki la buh da ki borni ba la pyndap da u shyiap ha sawdong jong ka jaka ba lait ka Gas, la ong shuh shuh ka jingpynbna.
La ïathuh ba ym duna ïa ka lai ngut ki briew ki la ïoh ïa ka jingpang khmat kaba rit bad ki dang shah sumar ha ki hospital, la ïathuh ki heh sorkar.
U District Superintendent of Police u Yatish Deshmukh uba la don ha katei ka jaka ba la lait ka Gas, u la kyrpad ïa ki nongshong shnong ba kim dei ban sheptieng namar ba ki bor ba dei peit ki dang shim ïa ki lad ki lynti ban tehlakam halor kane ka bynta.
U Jakhar u la kyrpad ïa ki briew ban shong beit hapoh ïing bad ban bud ïa ki jingbthah ba la ai da ka bor synshar.
“La buddien beit ïa ka jinglong jingman ha ka jingïatreilang bad baroh ki tnad ba ïadei kam. Ki nongshong shnong kim dei ban ngeit ïa ki khubor lamler,” la ong uwei na ki heh sorkar.
