Tehran, Lber:
U Ayatollah Alireza Arafi, u la shah thung kum u dkhot aiñ jong ka dorbar nongialam ba shipor jong ka Iran, ha ka Sngi U Blei. Kane ka la jia hadien ka jingshah pyniap jong u nongialam brim uba ha khlieh duh jong ka Iran- u Ayatollah Ali Khamenei ha ka jingleit khynra bad jinghiar thma jong ka US bad ka Israel.
Kane ka council kaba don ia lai ngut ki dkhot, kan shimti ïa ka jingkitkhlieh jong u nongïalam ba hakhlieh duh tad haduh ba ka Assembly of Experts kan jied ïa u nongmihkhmat ba thymmai u ban long u nongialam ba pura jong katei ka ri.
Kumta la ong ba, u Arafi u ïasoh bad u President Masoud Pezeshkian bad u Chief Justice U Gholamhossein Mohseni Ejei ha ka bor synshar ba shipor.
“Ngi la pynkhreh na ka bynta kum kine ki khyllipmat bad ngi don ïa ki jingthmu ha ka jaka na ka bynta baroh ki jingjia, wat na ka bynta ka por hadien ka jingshah pynïap jong u Imam Khamenei u nongialam ba don burom jong ka ri,” ong u Mohammad Bagher Qalibaf, u nongkren jong ka ïing dorbar thawaiñ jong ka Iran.
La kha ia u Alireza Arafi ha u snem 1959 ha ka nongbah Meybod jong ka jylla Yazd, kaba don ha pdeng jong ka Iran. U wan na ka longïing kaba tip briew- tip Blei. U kpa jong u, u Mohammad Ibrahim Arafi, u dei u riew niam uba don burom bha ha ka imlang- sahlang bad uba iajan bha bad U Ruhollah Khomeini, uba long u nongialam ba ha khlieh duh barim jong ka ri.
