Guwahati, Lber:
Ka Indian National Congress ha ka 3 tarik, Lber, ka la pyllait paidbah ïa ka thup kyrteng ba nyngkong jong 42 ngut ki kyrtong, na ka bynta ka jingïakhun ilekshon sha ka ïingdorbar thawaiñ jong ka Assam, kaba la khmih lynti ban long ha u bnai Lber. Ha ka jylla kaba don 126 tylli ki konstitwensi, ka thup ka long kumba shi bynta na ka lai bynta jong ka jingïakhun, bad mynta, ka ïathuh ïa ka khana kaba la tip bha shaphang kawei ka seng kaba ym lah ban lait im satia na lade.
Ka mat kaba paw bha ha ka khubor ka dei shaphang u Gaurav Gogoi. U Symbud Nongïalam jong ka seng Congress ha Lok Sabha uba la 43 snem ka rta bad u president jong ka seng ha Assam naduh u bnai Jymmang 2025, u Gogoi un ïakhun na Jorhat Assembly konstitwensi, ka jaka kaba u mihkhmat mynta ha Parliament. Ka dak ka long kaba ym lah ban bakla. U Gogoi u thmu ban ïalam na khmat, da kaba buh ïa ka lawei jong ka saiñ hima sima jong u ha ka jylla ha kaba ka kyrteng longïing jong u ka kit ïa ka jingkhia kaba khraw. Ka long ka jingleh kaba shlur, ka jait jingïakhun kaba pyni ba u Gogoi uba kham rit u sngewthuh ba ka jinglah jong ka Congress ha Assam kan ym lah ban khie im biang na ka jingshngaiñ jong ka Delhi.
Bad wat la katta ruh, ki katto katne kiei kiei shaphang ka Congress kim ju kylla. Ka thup hi kaba pynbna ïa ka jingangnud jong u Gogoi ka pynpaw ruh ïa ka jingieit kaba jylliew jong ka seng ïa ka jinghiar pateng jong ka saiñ pyrthei. Lai ngut ki kyrtong kiba don ha ka thup ki dei ki khun jong ki Myntri Rangbah barim. U Gogoi hi u dei u khun jong u Tarun Gogoi uba la khlad noh, uba la synshar ïa ka Assam haduh 15 snem. U Debabrata Saikia, uba ïakhun na ka Nazira, u dei u khun jong u Myntri Rangbah barim ka jylla, u Hiteswar Saikia.
U Diganta Barman, uba la mih madan na Barkhetri, u dei u khun jong u Myntri Rangbah barim ka Jylla, u Bhumidhar Barman. U Saikia bad u Barman ki dei ki MLA ba mynta. U Gogoi u dang pynlong ïa ka jingkiew jong u na ka Parliament.
Ka bynta kaba buh jingma ka nang ïaid shaphrang. U Tanzil Hussain, uba ïakhun na Samaguri, u dei u khun jong u MP ka Dhubri, u Rakibul Hussain, uba la mihkhmat ïa ka Samaguri, shuwa ba un jop ïa ka elekshon Lok Sabbha ha u snem 2024, da kaba pynliem ïa u heh ka AIUDF, u Badruddin Ajmal, da ka jingjop kaba phylla, kaba palat ïa ka shi Million vote. U Pranjal Ghatowar, uba la shah jied na ka Chabua-Lahowal konstitwensi kaba dang shu ker thymmai, u dei u khun jong u Myntri barim ka sorkar pdeng, u Paban Singh Ghatowar.
Ka Pallabi Saikia Gogoi, kaba ïakhun na Teok, ka dei ka pyrsa jong u MLA barim u Membar Gogoi, uba la long ruh u pyrsa kurim jong u Hiteswar Saikia uba la khlad noh. Ki tnat longïing jong ka saiñ hima sima jong ka Congress jong ka Assam ki ïasoh bha haduh katta katta ba ka thup kyrtong jong ka seng ka pule kham duna kum ka buit saiñ hima sima bad kham bun kum ka thup jong ka khanatang.
