Tehran, Lber:
Ki shipai Revolutionary Guards jong ka Iran, ha ka Sngi Balang, ki iathuh ba ki la hiar thma kumba 40 tylli ki namding, sha ki thong jong ka US bad Israel, ha ka sngi kaba phra jong ka thma ha Middle East kum ka jingpynshitom bein halor ka jingshah pyniap jong u nongialam ba ha khlieh duh jong ka Iran, u Ayatollah Ali Khamenei.
“Katto katne kynta mynshwa, ïa ka bynta ba 17 jong ka jingtreikam Honest Promise 4 la pynlong da ka jingsiat ïa ki 40 tylli ki namding da ki shipai aerospace jong ka Islamic Revolutionary Guard Corps, sha ki thong jong ki nong America bad Zionist,” ong ka kyrwoh ba la pule ha ka tv jong ka sorkar jylla, khlem da ai jingtip shuh shuh.
Utei u lyngdoh niam, uba la 86 snem ka rta, ula shah pyniap ha ka sngi saitjain, ha ka jinghiar thma lang jong ka US bad ka Israel.
“Ka kti jong ka jingpynshitom beiñ jong ka jaitbynriew Iran na ka bynta ka jingpynshitom kaba jur, kaba kut bad kaba sngewsih ïa ki nongpynïap ïa u Imam jong ka Ummah kan ym pyllait ïa ki,” la ong ki Guard tang hadien ba la pynthikna ïa ka jingïap jong u Khamenei da ki lad pathai khubor jong ka sorkar jylla.
Ym kum ki shipai ba rit paid, kiba wan hapoh ka Defence Ministry ha ka sorkar ba la jied, hynrei ki shipai Islamic Revolutionary Guards Corps ki jubab beit beit sha u nongialam ba ha khlieh duh.
Da ka jingkiew dor jong ka bor ding ha ka pyrthei baroh kawei namar ka thma kaba nang kiew, ki shipai jong ka Iran ki la ong ba ka don ïa ka “jingsynshar kaba pura” ïa ka duriaw bah Hormuz, ka jaka ba kongsan eh ban rung shapoh ka duriaw bah.
Ki sorkar ki la ialeh ban pynkynriah ia ki nongshong shnong kiba sahkut ha Middle East, ha kaba ka Iran ka la pynheh ia ki nam pynshitom bein bad ki drone.
Ki shipai US ki la ong ba ki la siat haduh 2000 tylli ki thong naduh ba ki la siat nyngkong ïa ki jinghiar thma ba shyrkhei bad ka Israel ïa ka Iran ha ka sngi saitjaiñ.
