U Rangbah shnong bad ka Dorbar shnong ki long kum ki rishot ka synshar paidbah. Ha ka dustur u khun Khasi Khara ka Bri u Hynñiewtrep u Rangbah shnong u long u khlieh ba la jied da ki paidbah jong ka shnong. Ha ka Dorbar shnong ym don ba heh ym don barit baroh ki la ryngkat ban ïa pyni ñia kynthup kyllum lang ïa u Rangbah Shnong, u Rangbah shnong bynrap bad ki Secretary kiba long kum ki nongpynïaid bad kum ki dkhot ba kongsan hapoh ka Dorbar shnong. Ki don de ki rangbah ba la jied da ka shnong ki ban peit ïa ka bha ka miat ka shnong ka thaw. Ka Dorbar shnong hi ka long ka Dorbar ba ha khlieh duh jong u paidbah ka shnong. ïa ka Dorbar shnong ki ju pynlong man u snem lane katkum ka rukom ba la buh bad pynbeit na ka Committee hapoh ka jingïalam u Rangbah shnong bad ka Executive Committee. U Rangbah shnong ba la jied da ki nongshong shnong u peit ba kiei kiei kin ïaid beit ïaid ryntih ha baroh ki paidbah ka shnong. U Rangbah shnong u ju trei bad pynïaid ïa u paidbah da ka mon sngewbha bad um ju shim kano kano ka jingmyntoi sha lade na u paidbah nongshong shnong. U Rangbah shnong u peit ba ki paidbah nongshong shnong kin long kiba tip briew tip Blei bad kin ïa shongsuk shongsaiñ hapoh ka shnong ka thaw. U Rangbah shnong bad ki dkhot ka Committee ba la jied na ki nongshong shnong ki long ka bor ba kongsan ban pynïaid beit ïa ka shnong ka thaw, ka dustur ka riti ba la pruid dak u barim ba jah. U Rangbah haba u shim kino kino ki jinglum pisa na ki paidbah nongshong shnong ki long katkum ka rukom ba la buh bad ai bor ka Dorbar shnong na ka bynta ka jingmyntoi jong ki nongshong shnong hi. Hooid ka don ka jingïapher ka rukom pynïaid na kawei ka shnong sha kawei pat hynrei kim don pat ka bor ban lum pisa khlem ka jingai bor ka Dorbar shnong bad ka Committee. U Rangbah shnong bad ka Executive Committee ki long tang kum ki nongpynïaid kam ïa kaei ba ka Dorbar shnong bad ka Committee shnong ka buh. ïa u Rangbah shnong ka Bri u Hynñiewtrep la jied da ki nongshong shnong ym ba jied ne thung da u Syiem ka Hima. U Syiem ka Hima u shu pynskhem beit ïa uba ki paidbah nongshong shnong ki la jied. U Rangbah shnong um dei ban don ka mynsiem ñiew shiliang ïano ïano hapoh ka shnong. Baroh ki nongshong shnong ki burom ïa u Rangbah shnong ba la jied da ki paidbah nongshong shnong ha ka Dorbar shnong.
C. B. Iawphniaw
