Gangtok, Lber 09
Ka kynhun ki nongthoh khubor kaba kynthup ïa 10 ngut ki dkhot na ka Jylla Meghalaya ki la poi ha Gangtok ha ka Sngi U Blei kum shi bynta ka jingleit ki nongthoh khubor kaba hynriew sngi sha ka Jylla Sikkim kaba la pynlong da ka Press Information Bureau (PIB) Shillong.
Ïa kane ka kynhun la pdiang sngewbha da ki ophisar jong ka PIB Gangtok ha ka por ba ki la poi.
Ïa kane ka jingleit la pynlong kum shi bynta jong ki sienjam ka PIB-Shillong ban pynkhlaiñ ïa ka jingïadei bad ki lad pathai khubor ha ka thaiñ bad ban ai ïa ki nongthoh khubor ïa ka jingshemphang shaphang ki sienjam ba kongsan ba ïadei bad ka roi ka par ha ki kam kum ka rep ka riang, ‘horticulture’, ka kam jngohkai pyrthei, ka jingwad bniah bad ka kam pynroi ha ki jaka khappud.
Ha kane ka jingleit, ka kynhun ki nongthoh khubor kan leit jngoh ïa ki katto-katne ki jaka treikam bad ki jaka ba kongsan ha kylleng ka Jylla bad kin ïakynduh bad ki heh ophisar bad kito kiba don bynta ha kane ka kam ban sngewthuh ïa ki sienjam kiba jop bad ki rukom treikam kiba bha tam.
Kane ka prokram ka kynthup ïa ka jingleit jngoh ïa ka ‘Spices Board India Regional Office’ ha Gangtok, ha kaba ki nongthoh khubor kin ïoh jingtip shaphang ki sienjam kiba ïadei bad ka jingrep kaba heh ïa u ‘Cardamon’, ka lad ban shalan mar shabar ri bad ki lad jingïarap ïa ki nongrep.
Ka kynhun kan leit jngoh ruh ïa ka ICAR-National Research Centre for Orchid ban ïoh jingtip shaphang ka jingwad bniah bad jingkyntiew ha ka kam thung syntiew, ka jingsumar ïa ki syntiew ‘Orchid’ bad ka kamai-kajih kaba pynshongnongrim ha ka rep ka riang.
Ki nongthoh khubor kin leit jngoh ruh ïa ka ‘Indian Orchid Festival 2026’ ha Pakyong, kaba pyni ïa ka jingbun ki jait syntiew ‘Orchid’ jong kane ka thaiñ bad kaba kyntiew ïa ka kam thung syntiew bad ka kam jngohkai.
Kum shi bynta jong kane ka prokram, kane ka kynhun kan leit jngoh ruh ïa ka ‘Vibrant Village’ ha Tingra ban sngewthuh ïa ki kam pynroi kiba la pyntreikam ha ki thaiñ khappud hapoh ka ‘Vibrant Villages Programme’.
Ka kynhun kan leit ïakynduh ruh ïa u Lat ka Jylla Sikkim bad ïa u Myntri Rangbah ka Jylla Sikkim ban sngewthuh ïa ki kam ba kongsan jong ka Jylla bad ki sienjam ba kongsan ba ïadei bad ka roi ka par.
Ka jingleit jngoh kan kynthup ruh ïa ki jaka jngohkai kiba pawnam kiba ïadei bad ka kolshor bad ka mariang kynthup ïa ka Rumtek Monastery, Ban Jhakri Falls and Energy Park, bad ka Tsomgo Lake, kaba pyni ïa ka riewspah jong ka kolshor bad ka kam jngohkai pyrthei jong ka Sikkim.
Kane ka kynhun kan leit jngoh ruh ïa ka jaka ba kongsan ha ka thaiñ khappud kum ka ‘Nathu La Pass’ bad ka ‘Baba Harbhajan Singh Mandir’ ban sngewthuh ïa ka jingdonkam jong ki jingdon-jingem ha ka thaiñ khappud bad ka bynta jong ki shipai ha kane ka thaiñ.
Ka ‘Press Tour’ ka thmu ban ïarap ïa ki nongthoh khubor ban ïohi ïa ka jingpyntreikam ïa ki skhim jong ka Sorkar India bad ki prokram ba ïadei bad ka roi ka par ha ki jaka nongkyndong, ban ïakren bad ki nongïoh jingmyntoi bad ki nongshong shnong, bad ban lum ïa ki khubor, ki dur bad ki jingshem ha ka jaka.
