Jowai, Lber 09
Ka Ummulong SC bad Goodwill Mupliang SC ki la khur jingjop ha ka District Cricket League 2026 ba la pynïaid da ka West Jaiñtia District Cricket Association ha ka lah sngi U Blei ha madan Wahïajer Mini Stadium
Ha kane ka jingïakhun, ka Ummulong SC ka la jop da 5 wiket ïa ka Dulong CC. Ka Dulong kaba la tied nyngkong ka la kamai 143 runs bad shah pynkhyllem baroh ki nongtied ha ki 28.5 over. U Marchan Lyngdoh ula tied 51 run na 52 bol kynthup ïa 8 tylli ki ‘four’ bad kawei ka ‘six’. Katba u Heimon Lyngdoh u la khur 3 wiket, katba u Sylvester Mylliempdah bad u M. Nelson Lamare ki la khur mar 2 wiket.
Haba wan shimti ïa ka pali kaba ar, ka Ummulong SC ka la kynjoh sha ka thong da kaba kamai 144 run ha ki 20.4 over bad shah pynhap 5 wiket. U M. Nelson Lamare u la tied 32 run na ki 20 bol, u Sylvester Mylliempdah u la ïoh 23 run na ki 29 bol bad u Rejoice Gassah u la ïoh 22 run na ka bynta ban pynskhem ïa ka jingjop. Katba u Marshal Pariat u la khur 2 wiket. Ïa ka nam Man of the Match la ïoh da u Heimonlang Lyngdoh jong ka Ummulong.
Haba phai sha kawei pat ka jingïalehkai kaba la long ha madan Khliehtyrchi, ka Goodwill Mupliang SC ka la jop da 5 wiket ïa ka Chutwakhu SC. Ka Chutwakhu kaba la tied nyngkong ka la kamai 112 run bad shah pynhap baroh ki nongtied ha ki 25.1 over. U Stellify N Sten ula tied 34 run, bad u Kunemi Lato u la ïoh 28 run. Katba u Echwa Phawa, Richest Star Dhar bad u Defender Dhar ki la khur mar 2 wiket.
Haba wan beh ïa ka thong, ka Goodwill Mupliang ka la lah ban kynjoh ïa ka thong da kaba kamai 115 run ha ki 16.1 over bad shah pynhap 5 wiket. U Byforcestar Dhar (not out) u la lah ban pyni ïa ka jingtbit na ka bynta ban kamai 75 run na ki 54 bol. Katba u Heisa Bareh u la khur 3 wiket. Ïa ka nam Man of the Match la ïoh da u Byforcestar Dhar.
Ha ka sngi Ba-ar ka jingïalehkai kan long hapdeng ka Shangpung CC pyrshah ïa ka War Jaintia United ha Khliehtyrchi Mini Stadium, katba ka Lion S&YA ïa ka Ummulong B ha Wahïajer Mini Stadium ha ka por 9 baje mynstep.
