Imphal, Lber:
Ha ka jinglap, arngut ki nongbud ba trei shitom jong ki kynhun bapher bapher kiba don hapoh khyndew kiba la kynnoh ba ki donkti ha ki kam rahbor la kem ryngkat bad ka pisa kaba T.1.89 lak tyngka ha ka por ba ki leh kyrpang ha ki ar tylli ki distrik jong ka Manipur ha ka sngi Saitjaiñ, la ïathuh ki pulit ha ka sngi U Blei.
Ka kynhun ba ïatreilang jong ki shipai pdeng bad ka jylla ki la kem ïa uwei u nongbud ba trei shitom jong ka People’s Revolutionary Party of Kangleipak-Progressive (PREPAK-Pro), u Laishram Inaotomba Singh (48) uba shong ba sah ha Achanbigei Thongkong Makha Leikai ha Imphal East district, na ka jaka jong u.
Na u la ïoh ban kurup ïa ka pisa kaba T.1,89,000 bad kawei ka Mobile Phone. La ïathuh ba u donkti ha ki kam dawa pisa bad rahbor briew.
Ha ka jingkhynra kaba ar, la ïoh kem ïa uwei u dkhot ba trei shitom jong ka seng Komunist Kangleipak-Meeyamgi Fingang Lanmee (KCP-MFL), uba la tip kyrteng kum u Khundrakpam Amar bad ba la tip ruh da ka kyrteng kum u Kamando Singh na Khangabok Awang Leikai ha ka thaiñ Thoubal, na ka shnong Aihang ha shilynter ka surok Indo-Burma ha Sugnu Road ha Thoubal distrik.
Ki khubor ki ïathuh ba une u dkhot ba la shah kem u dei uba donkti ha ka kam rahbor kaba la ujor ha thanad Waikhong kaba don ha Kakching district, ha kaba mynta ka dang don hapdeng ka jingtohkit.
Ïa kine kiba shah kem ryngkat bad ki tiar ba la ïoh kurup la aiti noh sha ki thanat ba dei peit ban leh ïa kaba donkam katkum ka aiñ.
Katba ki bor pahara ki dang bteng ban pynlong ïa ki jingtalasi bad ka jingsynshar ïa ki jaka ha ki jaka ba marjan bad ki jaka ba rit paid ha kylleng ki district. Baroh 116 tylli ki nakas/checkpoint la buh ha ki distrik bapher bapher jong ka Manipur, ha ki lum bad ha them; hynrei ym shym la don mano mano ba la shah kem ha kane ka jingpyntreikam kaba kyrpang.
Shuh shuh, la pynthikna ïa ka jingïaid jong ki 196 tylli ki kali kiba kit ïa ki tiar ba donkam ha shilynter ka surok bah NH-37.
Ki lad pahara kiba pyrkhing bha ki don ha baroh ki jaka kiba lah ban shah ktah, bad la pynbiang ïa ki kali pahara ha ki jaka ba rit paid ban pynthikna ïa ka jingïaid lynti kaba laitluid bad kaba shngaiñ.
