Shillong, Lber 09
Ka Lawsohtun ka la khur ïa ka jingjop ha kaba sdang ïa ka Late P.A. Sangma Memorial T20 Trophy 2026 ba la pynlong da ka Shillong Cricket Association (SCA) hadien ba ka la pynliem noh ïa ka Cluster CC da 20 run ha ka lah sngi U Blei.
Ha kane ka lympung la wan shim bynta da 18 tylli ki kynhun kiba na kane ka nongbah lem bad ar tylli kiba na Guwahati, ha kaba la phai ïa ki ha ki saw tylli ki group.
Haba phai sha kane ka jingïakhun, ka Lawsohtun ka la kam trai ban tied nyngkong ha kaba ka la kamai 139 run bad shah pynkhyllem baroh ki nongtied ha ki 20 over. U Klos Lyngdoh u la khyrwit ha ka shiteng spah kaba 67 run na ki 45 bol bad u Peter Lyngkhoi u la ïoh 17 run na ki 16 bol. Katba u Pankaj Chanda u la khur 2 wiket bad ïa ka 1 wiket la ïoh da u Vishal Paul.
Haba wan beh ïa ka thong, ka Cluster ka la kamai tang 119 run bad shah pynkhyllem baroh ki nongtied ha ki 18.4 over. U Md. Sammer u la tied 30 run na ki 33 bol bad u Pankaj Chanda u la ïoh 14 run na ki 10 bol. Katba u Klos Lyngdoh bad u Cavin ki la khur 2 wiket. Ïa ka nam Player of the Match la khur da u Klos Lyngdoh.
Ha kawei pat ka jingïakhun kaba ar hapdeng ka Sporting CC bad ka MLP la pynsangeh noh na ka daw ka jingshah pynthud ha u slap.
