Shillong, Lber 09
Ka jinglah ban ïalehkai bha ka la pynlong ïa ka kynhun ki ‘thei ïalehkai ka Meghalaya ban pynliem noh ïa ka Nagaland da 6 wiket ha ka lympung ïalehkai BCCI’s U-23 Women’s One Day Trophy 2025-26 (plate group) ha ka lah sngi U Blei ha Chandigarh.
Ka kapten kane ka kynhun ka Monica L Phawa ka la lah ban ïalehkai bha na ka bynta ban pynlong ïa ka Meghalaya ban poi sha ka thong ka jingjop kaba 146 run ha ki 46 over. Ka Monica kaba khlem shah pynkhyllem, ka la kamai 78 run na ki 132 bol, kynthup ïa khyndai tylli ki ‘four’.
Kham hashwa ka Meghalaya kaba la jop ïa ka kynting pisa, ka la jied ban kawang bol nyngkong ha kaba ka la lah ban pynkhyllem baroh ki nongtied ka Nagaland na ka bynta ban kamai tang 145 run ha ki 46 over. U Cheanchi K Sangma (3/29), Blaridahun Dkhar (3/41), Indarïakor Kharwanniang (2/24) bad ka Monica Singh (2/33) ki la long ki khlur nongkawang bol ba kynsai, katba ka Iluneule Zeliang (46 run na ki 77 bol) ka la long ka nongtied ba kynsai na ka bynta ka Nagaland.
Ka Nagaland kaba la jop ha baroh lai tylli ki jingïalehkai ba la lah, hynrei mynta ka sngi kam shym la lah ban ïakhun pyrshah ïa ka Meghalaya.
Haba wan beh ïa ka thong ki nongtied ka Meghalaya kiba kynthup ïa ka Monica Phawa bad ka Ankita Sharma (14 run na ki 62 bol) ki la lah ban kynjoh sha ki 68. Ka Ankita ka la pyrshang ban ïakhun tyngeh hashwa ban shah pynkhyllem, bad ban pynlong ïa ka Meghalaya ban kynjoh sha ki 107/4 bad ban ai jingkyrmen ïa ka Nagaland.
Hynrei ka Monica Phawa ka la bteng ban ïakhun tyngeh ha ryngkat ka jingkyrshan lang da ka Janika Marak (18 not out, 31 balls) ha kaba ki la lah ban pynurlong na ka bynta ka Meghalaya bad ban pynsah sa 4 over.
Kumba ka paw ha kane ka lympung, ka Meghalaya kam shym la lah ban ïalehkai bha ha kaba sdang kane ka lympung ha kaba ka la shah rem ha ka Manipur da 5 wiket bad ha ka Sikkim da 88 run.
Ha ka sngi Saitjaiñ, ka Meghalaya ka la ïoh mynsiem ha kaba ka la pynliem noh ïa ka Arunachal Pradesh da 8 wiket. Ha katei ka jingïakhun ka Arunachal ka la kamai 79 run bad shah pynkhyllem baroh ki nongtied. Ka Monica Singh ka la khur 4/12 ha ki 9.5 over, katba ka Sara Dafica Kharbani ka la khur 2/35.
Hynrei ka Meghalaya ka la lah ban kynjoh sha ka thong ha ki 23 over. Ka Janika (22), Ankita (23), Suriti K Ray (16) bad ka Monica Phawa (16) ki la lah ban ïalehkai bha.
Te kumta lyngba kane ka jingjop, ka Meghalaya ka la don mynta ha ka kyrdan balai bad ka dangdon jingkyrmen ban ïoh rung sha ka final. Kan ïakhun pyrshah ïa ka Mizoram kaba don ha ka kyrdan ba-ar, ha ka jingïalehkai kaba khatduh ha ka sngi Balang.
