Jowai, Lber 11
Ka PCC Phramer bad ka Wahïajer SC ki la khur jingjop ha ka District Cricket League 2026 ba la pynïaid da ka West Jaiñtia District Cricket Association (WJDCA) ha ka sngi Balang.
Ha ka jingïalehkai kaba la long ha madan Khliehtyrshi, ka PCC Phramer ka la pynliem noh ïa ka Riwar Titan C.C da 81 run. Ka PCC Phramer kaba la kam trai ban tied nyngkong ka la kamai 253 run bad shah pynhap 10 wiket ha 27.3 over. U Phiner Tang ula long u nongtied uba kynsai ha kaba u la ïoh ban khyrwit 116 run na 50 bol bad u Kamni Suna ula ïoh 35 run. Katba ki nong kawangbol ka Riwar Titan, u Kermi U Tariang u la khur 4 wiket bad u Mickey Marngar ula ïoh 3 wiket.
Haba wan beh ïa ka thong ka Riwar Titan ka la kamai tang 172 run bad shah pynhap 9 wiket ha ki 35 over. Kane ka la wan lyngba ka jingïalehkai bha ki nongkawang bol ka PCC Phramer, u Melan Suchiang lem bad u Heibiang Suchiang kiba la khur mar 3 wiket. Ïa ka nam Man of the Match la khur da u Phiner Tang.
Haba phai sha ka jingïalehkai ha madan Wahïajer, ka Wahïajer SC ka la pynliem ïa ka Khimusniang CC da 262 run. Ka Wahïajer SC kaba la tied nyngkong, ka la kamai 343 run na ki 35 over bad shah pynhap 6 wiket. U Heimon Dkhar ula la long u nongtied uba kynsai ha kaba u la ïoh ban khyrwit ïa ka spah run kaba 108, kumjuh u George Ryngkhlem ula tied 76 run na ka 28 bol bad u Hillel Susngi u la tied 57 run. Na ka liang ki nongkawang bol ka Khimusniang, u Jeffrey Litting bad u Nibiangmon Sutnga ki la khur mar 2 wiket.
Haba wan beh ïa ka thong, ka Khimusniang kam shym la lah ban ïalehkai bha ha kaba ka la kamai tang 81 run bad shah pynhap 8 wiket ha ki 21 over, bad la pynsangeh noh ïa kane ka jingïalehkai na ki daw ka jingshah pynthut ha u slap. U Rimiyoo Syih u la tied 24 run na ki 28 bol bad u Ebenezer Sutnga ula ïoh 17 run. Katba u Mebanker Suting ula khur 3 wiket na ki 5 over bad u Janai Talang u la ïoh 2 wiket. Ïa ka nam Man of the Match la khur da u Heimon Dkhar.
Ka jingïalehkai ha ka sngi Palei kan long hapdeng ka The Legend (Lissi Pearl) bad ka Evergreen Mukhla Mission ha Khliehtyrchi Mini Stadium, katba ka Moodymmai SU ïa ka Lads ha Wahïajer Mini Stadium. Kine ki jingïalehkai kin long ha ka por 9 baje mynstep.
