Shillong, Lber 11
Ka United XI ka la pynliem noh ïa ka Lawsohtun CC da 5 wiket na ka bynta ban khur ïa ka jingjop ha ka lympung ïalehkai Late P.A.Sangma Memorial T20 Cricket Tournament 2026 ba la pynlong da ka Shil-long Cricket Association (SCA) ha ka sngi Balang.
Ha kane ka jingïakhun kaba la long ha madan ïalehkai jong ka MCA ha Polo, ka Lawsohtun ka la kam trai ban tied nyngkong ha kaba ka la kamai 110 run bad shah pynhap 8 wiket ha ki 18 over. U Aaron Lamare u la tied 27 run na ki 27 bol bad u Manchester Pathaw u la ïoh 26 run na ki 35 bol. Katba u Bijon Dey bad u Navin Kumar Ray ki la khur mar 2 wiket na ka bynta ka United.
Haba wan shimti ïa ka pali kaba ar, ka United XI ka la lah ban kynjoh sha ka thong da kaba kamai 114 run bad shah pynhap 5 wwiket ha ki 17.4 over. U Ganeshstar Syiem u la tied 39 run na ki 18 bol bad u Yogesh Tiwari u la ïoh 35 run na ki 45 bol. Katba u Deibormi Rngad bad u Greatestful Lyngkhoi ki la khur mar 2 wiket na ka bynta ka Lawsohtun. Ïa ka nam Player of the Match la khur da u Navin Kumar Ray.
Haba phai sha kawei pat ka jingïalehkai hapdeng ka Mawsyiem CC bad ka Sporting CC, la hap ban pynsangeh noh na ka daw ka jingshah pynthup ha u lapbah uba jur ha ka por shiteng sngi.
