Shillong, Lber 11
U President ka US u Donald Trump u la ong ba ïa ka Iran yn pdiang sngwbha ban ïashim bynta ha ka World Cup watla kine ki ar tylli ki ri ki dangpdiang hapdeng ka thma kaba jur, la pynpaw u President ka FIFA u Gianni Infantino ha ka sngi Balang.
Ha kaba pynpaw ha ka Instagram, u Infantino u la ong ba u la ïakynduh ïa u Trump ha ka sngi Ba-ar na ka bynta ban ïamir jingmut halor ka jingpynkhreh na ka bynta katei ka lympung, ïa kaba pynlong lang da ka US, Canada bad Mexico ka ban sdang naduh 11 tarik u Jylliew.
U Infantino u la ong ba ma u bad u Trump ki la ïakren halor ka jinglong jingman ha Iran.
Kumba ka paw ka Iran ka dei ban shim bynta ki lai tylli ki jingïalehkai ha US, hynrei kane ka jingpynkhreh ka la don hapdeng ka jingartatien naduh ba ka US bad ka Israel ki la hiar thma ïa katei ka ri mynta u bnai, ha kaba u khlieh duh ka Iran u Ayatollah Ali Khamenei u la shah pynïap.
Ka Iran ka la jubab da kaba siat da ki namding bad ki drone sha Israel bad sha ki saw tylli ki ri Arab kiba pynlong ïa ki ktem shipai jong ka US kum ka Bahrain, Kuwait, Qatar bad United Arab Emirates.
“Ha ka jingïakren, u Trump u la pynpaw biang ba ka kynhun ïalehkai jong ka Iran, shisha ka long kaba la pdiang sngewbha ban ïashim bynta ha katei ka lympung ha America”, la bynrap u Infantino.
“Baroh ngi donkam ïa ka jingïalang kum ka Fifa World Cup ban pynïasoh lang ïa ki briew mynta kham bunsien, bad nga ai khublei shibun eh ïa u President jong ka ri America na ka bynta ka jingkyrshan jong u, namar ka pyni sa shisien ba ka phutbol ka pynïatylli ïa ka pyrthei.”
“Baroh ngi donkam ïa ka lympung ïalehkai kum ka FIFA World Cup ban pynïasoh lang ïa ki briew mynta kham bunsien, bad nga ai khublei shibun eh ïa u President jong ka ri America na ka bynta ka jingkyrshan jong u, namar ka pyni sa shisien ba ka phutbol ka pynïatylli ïa ka pyrthei.”
Kumba ka paw ka Iran kan ïakynduh pyrshah ïa ka New Zealand bad ka Belgium ha Los Angeles ha ka 15 bad 21 tarik u Jylliew, katba ïa ka Egypt ha Seattle ha ka 26 tarik u Jylliew.
