Kum ki nongshong shnong ngi hap ban shim hi ka jingkitkhlieh ban pyni bad sdang shwa nalade na ka bynta ban kyntiew la ka dei ha kano kano ka bynta ruh. Barabor hi na ka bynta kiei kiei, kum ki nongshong shnong ngi ju khmih lynti bad phai khmat beit tang sha ka Sorkar ne ki bor ba dei khmih ban leh ne pynbeit ïa kiei kiei kiba dei bad ngi klet noh pat ïa la ka jong ka kamram. Lada ngi shim ka jingkitkhlieh bad sdang shwa nalade, ngin sa lah ban ïohi bad sakhi ïa ka jingïashim bynta lang jong kiwei pat. Kumno ngin khmih lynti ba kiwei kin leh bad bud ïa ki jingpynbeit ne ki kyndon lada nalade shimet ngi leh bym suidñiew.
Haba phai ha kane ka bynta, ngi ïohi ba ki nongshong shnong ka Jylla Sikkim, kaba dei kawei na ki jylla ka thaiñ Shatei Lam-Mihngi, ym tang ba ki bud ryntih ïa ki jingbthah hynrei ki da shim ruh ha lade ïa ki jingkitkhlieh na ka bynta ban wanrah ïa ka burom ka nam jong ka shnong bad ka jylla hi baroh kawei. Haba ngi phai sha ka Jylla Sikkim kaba dei kawei na ki jylla kaba rit hapoh ka Ri bad kaba don ruh ki nongshong shnong tang kumba 6 ne 7 lak tam, hynrei ngi ïohi ba kiba bun ki shnong hapoh kane ka Jylla ki long kiba khuid bad kane kam dei tang na ka jinglah jong ka Sorkar hynrei ka dei ruh lyngba ka jingshim jingkitkhlieh lang da ki nongshong shnong ban pynneh ïa ka khuid ka suba la ha ki jaka ïew ne ki lynti ki syngkien. Katkum ka jinglap bad jingtip la ïathuh ba kawei na ki bynta jong ka jinglah ban pynneh ïa ka jingkhuid, ka dei ruh lyngba ka jinglah jong ki briew ba khmih ïa kane ka bynta naba ki kali kit ñiut ym dei ba ki lum ñiut shisien ha ka shisngi hynrei tang hadien katto katne kynta, ki la wan ban lum ïa ki ñiut kiba la buh bad pyllang bha shi jaka.
Nalor ka jingkhuid kaba la bna nam ha baroh kawei ka ri, bad nalor ki jaka kiba itynnad bad kiba khring shi katdei eh ïa ki nongjngohkai na kylleng ki bynta jong ka ri bad ka pyrthei hi baroh kawei, kawei pat ka bynta kaba ka Sikkim ka la lah ban pynneh bad pynlong jai jai ïa ka leit ka wan, ka dei na ka jingduna bha jong ki kali ban pynpah ‘Horn’ ym kum ha kiwei pat ki bynta jong ka ri bad ruh ha Meghalaya ha kaba ngi ju sakhi ba tang mar ïasangeh ki kali ne haba shong ha ka dheng kali, la riew kita ki ‘horn’ kiba ym sngewthuh sngewthaw shuh bad bunsien lei ki la kylla long ki dawbah jong ka dheng kali. Hynrei ha jylla Sikkim, kham ñiar ban ïoh sngew ïa ka jingpynpah ‘horn’. Kane ka jinglah ym dei eh tang namar ba ki bor khmih ki la bthah hynrei ka dei ruh lyngba ka jingshim bynta bad kitkhlieh lang jong ki nongñiah kali. Kawei pat ka bynta, ka long ba kum ki nongshong shnong ruh ki bud ryntih ïa ka jingmana ban bret pathar la ki dei ki jaboh jabaiñ ne ki plastik chip ne kiwei kiwei ha ki rud surok ne ki lynti syngkien bad lyngba ka jingshim jingkitkhlieh lang jong ki nongshong shnong, wat ki briew ba nabar ruh ki shem shynraiñ ban bret pathar, namar haba rung shapoh kane ka Jylla, la dep ban pyntip lypa da ki nongñiah kali kamai ne kino kino ki briew kiba kit ïa kita ki kyndon kiba la buh lypa ba ym dei ban leh pathar ne wat ban leit shabar pathar wat ha ki rud surok kiba don jngai na Sor.
Wat haba leit sha ki jaka jngohkai ruh ki long kumjuh. Haba phi poi ha kine ki jaka, ka la don lypa ka jingpyntip na ki nongshong shnong ne ki nongdie dukan jong kito ki jaka bad ruh ki nongñiah kali kiba kit ba ym lah ban leh pathar ne bret jaboh pathar bad ba lada lap, yn shah daiñ kuna.
Kumta ngi sngew donkam ban kyntu ïa ki nongshong shnong ka Meghalaya ruh ba ngin bud ïa kum kine ki nuksa ba ngin lah ban kyntiew ïa ka nam ka burom jong ka Jylla, kaba la dei lypa ka Jylla kaba la bna nam shibun khamtam ha ka liang ki kam jngohkai pyrthei bad ka jingdon jong ka shnong kaba khuid tam, ka jinghap jong u slap ba jur tam bad kumta ter ter. Kumta lada ngi lah lei ban wanrah ïa ka jingkhuid jingsuba khamtam lei ha ki bynta pdeng jong ka nongbah Shillong bad wat sha kiwei ruh ki bynta, ngin sa nanglah ban nang sngew sarong shuh shuh kum ki trai shnong.
