Kohima, Lber:
Ka sorkar Nagaland ka la pynthikna ïa ki nongshong shnong ba kam don jingduna ei ei ha ka LPG ba pyndonkam ha ka jylla bad ka la kyntu ïa ki nongpyndonkam ba kim dei ban tieng ne ban leh ïa ki jingkynshew khlem da donkam.
Kane ka jingpynthikna ka la wan hadien ka jingïalang bishar bniah ban bishar bniah ïa ka jingdon jong ka LPG bad kiwei kiwei ki umphniang ha ka jylla, ong ka khubor ba la pynmih ha ka sngi Thohdieng.
Ha kane ka jingïalang kaba la long ha ka 13 tarik u Lber, la leit ban ïashim bynta da ki Deputy Commissioner jong ka Kohima, Dimapur bad Chumoukedima distrik, ha ryngkat ki ophisar na ka tnad sam bam bad sam paidbah bad ki nongmihkhmat jong ki kompeni die umphniang.
Hadien ba la bishar bniah ïa ka jinglong jingman jong ki stok mynta, ka tnad ka la pynpaw ba ka stok LPG kaba biang hapoh ka ri ka don ha ïew bad ba ka jingpynbiang ha kylleng ka jylla ka dang sahkut.
Halor kane, ka tnad ka la kyrpad ïa ki nongthied ba kim dei ban thaw ïa ka jingduna thok da kaba thied da kaba tieng ne lum lang ïa ki tyndong LPG. Ki bor pynïaid ki la maham ruh ïa ki nongsam, ki nongdie marbam bad ki riew shimet ba ka jingdie black, ka jingpynkiew dor palat ne ka jingdie khlem jingbit ïa ka LPG hapoh ka ri ka long kaba be-aiñ bad lah ban pynshitom katkum ki kyndon aiñ kiba ïadei. Ka sorkar ka la maham ba yn leh da kaba tyngeh pyrshah ïa kino kino ki briew lada lap ba ki donkti ha kum kine ki jait kam.
