Shillong, Ïaïong 05
Ka Sputnik CC bad ka Rhino Cricket Academy ki la khur jingjop ha ka Super 8 jong ka lympung ïalehkai P.A.Sangma Memorial T20 Cricket Tournament 2026 ba la pynïaid da ka Shillong Cricket Association ha ka sngi U Blei.
Ha kane ka jingïakhun kaba la long ha madan Polo, ka Sputnik CC ka la pynliem noh ïa ka Lok Bhawan CC da 55 run. Ka Suptnik kaba la kam trai ban tied nyngkong, ka la kamai 163 run bad shah pynkhyllem 7 wiwket ha ki 20 over. U Mark JV Ingty u la tied 37 run na ki 29 bol bad u Swarajeet Das u la ïoh 30 run na ki 25 bol. Katba u Biksah Singha u la khur 2 wiket bad ïa ka 1 wiket la khur da u Suraj Chettri.
Haba wan beh ïa ka thong, ka Lok Bhawan ka la kamai 108 run hadien ba ka la shah pynkhyllem baroh ki nongtied ha ki 17.4 over. U Krishna Chettri ju la tied 56 run na ki 31 bol. Katba u Nafees Siddique u la khur 3 wiket bad ïa ki 4 wiket la khur da u Aditya Singhania. Ïa ka nam Player of the Match la khur da u Nafees Siddique.
Ha kawei pat ka jingïalehkai, ka Rhino Cricket Academy ka la jop da 62 run ïa ka Capital Stars. Ka Rhino ka la kamai 215 run bad shah pynhap 4 wiket ha ki 20 over. U Nihar Deka u la tied 99 run na ki 52 bol bad u Sumit Kashyap u la ïoh 40 run na ki 22 bol. Katba u Abdul Ajij Kuraishi u la khur 2 wiket bad ïa ka 1 wiket la khur da u Joydeep Singh.
Ka Capital Stars kaba la wan shimti ïa ka pali kaba ar, ka la kamai tang 153 run bad shah pynhap 9 wiket. U Joydeep Singh u la tied 53 run na ki 34 bol. Katba u Tapan Kumar Sharma bad u Nihar Deka ki la khur mar 2 wiket. Ïa ka nam Player of the Match la khur da u Nihar Deka.
