Shillong, Ïaiong 03
Ka lympung ïalehkai Cricket kaba la tip kum ka 1st Central Ri Bhoi Cricket League 2026 ba la pynlong da ka Central Ri Bhoi Cricket Association (CRCA) mynta ka la poi sha ka kylla kaba ar lane ka 2nd Round.
Ha ki jingïakhun ha kane ka kylla ba la pynlong ha ka 2 tarik Ïaiong 2026, ha ka jingïakhun ba nyngkong la jop da ka Umran Ñiangbyrnai Cricket Club kaba la kamai 190 ron pyrshah ïa ka Mawtnum Socio & Cultural Sports Club kaba la kamai tang 155 ron.
Ha ka jingïakhun kaba ar la jop da ka DC Combine XI kaba kamai 76 ron pyrshah ïa ka Umroi Circle United Cricket Club kaba la kamai 72 ron.
Kumban shu kdew ïa kane ka lympung kaba la sdang naduh ka 21 tarik Lber 2026 la wan plie ïa ka da u James PK Sangma, President ka Meghalaya Cricket Association (MCA).
Ki don haduh kumba 24 tylli ki kynhun lane ki ‘Team’ kiba na kylleng ka Ri Bhoi District kiba la poi ban shim bynta ha kane ka lympung bad ka dei ka ruh ka lympung ba nyngkong ha Ri Bhoi kaba la pynlehkai da ka Deuce Ball.
