Shillong, Ïaïong 05
Ka Wahmawpat SC bad ka Mawlum Tyrsad SC ki la khur jingjop ha ka lympung ïalehkai Women’s Football League ba la pynïaid da ka Tyrsad Area Sports Association (TASA) ha ka sngi Saitjaiñ.
Ha kane ka jingïakhun kaba la long ha madan Mawlum Tyrsad, ka Wahmawpat ka la pynliem noh ïa ka Nongmadan SC da 4-1 kol. Kane ka la wan urlong lyngba ki kol ba la thep da ka Mebarihun Kariang (9), Agulityborn Marngar (23), Phinisha Wanñiang (33) bad ka Thianglin Kharnaïor (46). Katba na ka liang ka Nongmadan ka la pynphai kylla shi kol lyngba ka Ibanphira Mawlong (25).
Haba phai sha kawei pat ka jingïalehkai kaba ar, ka Mawlum Tyrsad ka la pynjem khnap haduh 5-0 kol ïa ka Nongwah SC. Ka Irilang Khongsit ka la khur syndon da ka hat-trick hadien ba ka la ïoh thep ha ka minit kaba 12, 15 & 52 bad kiwei pat ki ar kol la thep da ka Wanrihun Kharnaïor ha ka minit kaba 24 & 54.
