Aizawl, ïaïong:
Ka jylla Mizoram, ka la sdang thikna ïa ka bynta jong ka jingkheiñ hi dalade jong ka Census 2027, ha kaba u Myntri Rangbah ka Jylla, Lalduhoma, u la pyndep ïa ka jingpynrung kyrteng jong u, lyngba ka online, ha ka taïew ba la lah, ha ka 1 tarik. Ïaïong, ong ki heh sorkar.
U Myntri Rangbah ka Jylla u la pynlong ïa kane ka kam ha ka ïing sah jong u da kaba pyndonkam ïa ka jaka kheiñ briew kaba dang shu pynrung thymmai, kaba pynpaw ïa ka jingpdiang jong ka jylla ïa ka rukom lum jingtip kaba pyndonkam da ka digital. Ki ophisar na ka Aizawl Municipal Corporation, ka tnad pynïaid paidbah bad ka Directorate of Census Operations ki la ïadon lang ban ïarap ha kane ka jingpyntreikam.
Ki dkhot ba kham rangbah jong ka kynhun Myntri ka jylla, kynthup ïa u Myntri ka tnat ki kam pohïing u K Sapdanga bad u Myntri ka tnad Kam paidbah u Vanlalhlana, ki la pyndep ruh ïa ka jingkheiñ ïalade kham mynshwa ha kane ka sngi, kaba pyni ïa ka jingpynbor jong ka sorkar ban ïashim bynta lang kham bun ki paidbah.
Ka rukom kheiñ briew hi, kaba la pyntreikam na ka bynta ka jingkheiñ briew kaba 16 jong ka ri India kaba dang ïaid shakhmat, ka ailad ïa ki nongshong shnong ban aiti ïa ki jingtip ba kyrpang bad ki jingtip ba ïadei bad ka ïing lyngba ka web kaba shngaiñ shwa ban sdang ïa ka jingjurip tynrai na jingkhang sha jingkhang. Kane ka bynta ka kyrshan ïa ki 16 tylli ki ktien bad la shna ïa ka ban pynsuk ïa ka jinglum jingtip katba ka pynduna ïa ka jingtrei da ka kti.
Ki bor pynïaid ki la ïathuh ba ka jingkhang ban kheiñ ïalade ha Mizoram kan dang plie naduh ka 1 tarik, Ïaïong haduh ka 15 tarik u Ïaïong, da kaba kyntu ïa ki nongshong shnong ban pyndep ïa ka jingtreikam hapoh ka por ba la buh khnang ban pynthikna ïa ki jingtip ba thikna bad kiba biang por.
