![Shah jied 2 ngut ki khynnah ban leit shah pyntbit sha Spain spain](https://unongsainhima.com/wp-content/uploads/2023/06/spain-jpg.webp)
Shillong, Jylliew 12:
Ar ngut ki khynnah ïalehkai phutbol ka Jylla, u Kynsai Kupar Bareh na Sutnga bad u Federick Kupar Kurbah na Mawkalum, Ladmawreng ki la shah jied ban leit shah hikai ha ka shlem ai jinghikai jong ka Rush Football Academy kaba na Valencia, Spain.
Ka jingshah jied jong kitei khynnah ka wan hadien ba ki lah ban pynpaw ïa ka jingtbit ha ka prokram jied khynnah ba la pynlong da ka Ryntih Football Club lem bad ka Max Sports Academy ha Assam Rifles, Shillong. Ïa kane ka prokram la pynlong ha lai tylli ki jylla jong ka ri kita ha Delhi, Odisha bad Meghalaya
U Wanllam Kupar Kharpran jong ka Ryntih FC, u pynpaw ba na ka liang ka klob ka la ïateh ka soskular bad ka Max Sports Academy, namar ka shem ba ka don ka lad ka lynti, katno tam lei lei hadien ba la ïoh jingtip ba ka Max Sports Academy ka don ïa ka jingïadei kaba ïajan bha bad ki kato katne ki klob ba don ha Spain bad Portugal.
Ha kane ka jingpyrshang la wan ban ïashim bynta da kumba 100 ngut ki khynnah. Napdeng kine ki don tang ar ngut kiba la shah jied. “Ngi khmih lynti ba kine ar ngut ki khynnah kiba la shah jied kin lah ban ïalehkai bha ynda haba ki la poi ha Valencia ne wat haduh ba kin da lah ban shah jied ban ïakhun ha ki lympung ïalehkai jong ka 4th ne 3rd Division ha Spain.”
Shuh shuh u Bah Wallam u la ong ruh ba ïa mynta ka jingpynlong ïa kum kane ka prokram ka dang dei tang ka jingsdang kaba nyngkong ïa ka klob, hynrei la khmih lynti ban sa pynlong biang ïa kum kine ki jait prokram khnang ba ki khynnah kin ïoh ïa ka jingshah pyntbit sa sha Portugal.
Ka prokram kan nym kut eh tang ha ka ban jied ïa ki nongïalehkai, hynrei u Bah Wallam u pynpaw ba kan sa don ruh ka prokram ban jied wat ïa kito ki samla rangbah ba kwah ban pyntbit na ka bynta ban long kum ki coach ha kaba ki lah ruh ban ïoh wat ïa ka licence jong ka UEFA.