Shillong, K’lyngkot 13
Ka lympung ïalehkai Third Division Cricket League 2024-25 ba la pynïaid da ka Shillong Cricket Association (SCA) ka la nangjam shaphrang ha kaba ka Sanmer bad ka Elite XI ki la ïoh jingjop ha ka Lah Sngi U Blei.
Ha kane ka jingïakhun kaba la long ha madan Urkaliar, Shillong, ka Sanmer ka la pynliem noh ïa ka Youth Stars da 32 run. Ka Sanmer kaba la shimti shwa ban tied nyngkong ka la ïoh 147 run bad shah pynhap 9 wiket. Kane ka la wan urlong lyngba ka jingïakhun tyngeh u Pynshngaiñ Dkhar uba la ïoh ban khyrwit ïa ka shiteng spah kaba 51 run na ki 45 bol bad u Donborlang Marbaniang u la ïoh 33 run na ki 21 bol. Katba u Adarsh Kr Tiwari u la shim 3 wiket bad 2 wiket la ïoh da u Mrinmoy Das na ka bynta ka Youth Star.
Haba wan beh ïa ka thong ba la buh da ka liang pyrshah, ka Youth Star ka la ïoh tang 115 run bad shah pynhap 10 wiket ha ki 14.0 over. U Adarsh Kr Tiwari u la tied 38 run na ki 31 bol bad u Kunal Goswami u la ïoh 19 run na ki 15 bol. Katba u Jhon Dkhar na ka Sanmer u la shim 4 wiket na ka bynta ban ïohpdiang ïa ka nam ‘Player of the Match’.
Haba phai sha kawei pat ka jingïakhun ba ar, ka Elite XI ka la lah ban pynliem noh ïa ka Municipal CC da 9 wiket. Ka Elite XI kaba la jop ïa ka kynting pisa, ka la ailad shwa ïa ka Municipal ba kan tied nyngkong ha kaba ka la ïoh 91 run bad shah pynhap 10 wiket ha ki 14.2 over. U Aman Bardewa u la tied 29 run na ki 30 bol. Katba u Arkadipta Chaudhary u la shim 4 wiket na ka bynta ka Elite bad ïohpdiang ruh ïa ka nam ‘Player of the Match’.
Haba wan shimti ïa ka pali ba ar, ka Elite XI ka la kynjoh sha ka thong da kaba ïoh 92 run bad shah pynhap 1 wiket ha ki 8.1 over. U Ujjal Singh u la tied 39 run na ki 23 bol bad u Shubham S Thakur u la ïoh 32 run na ki 16 bol.
