![Hadien ba khur ïa ka khusnam Grand Slam ba 23, wanphai kyrdan ba nyngkong u khlur ïalehkai Tennis na Serbia djokovic](https://unongsainhima.com/wp-content/uploads/2023/06/djokovic--jpg.webp)
Belgrade, Jylliew:
U khlur ialehkai Tennis na ka ri Serbia u Novak Djokovic mynta ka kynti u la ioh ban wanphai biang sha ka kyrdan ba nyngkong ha ka pyrthei ha ka thup kyrdan jong ka ATP, hadien ba u tei u rangialehkai u la lah mynta ban khur shalade ia ka trophy jingjop na ka lympung ialehkai ba dang shu dep long jong ka French Open.
Ha ka jingiaknieh na bynta ban rah nam lahduh ha katei ka lympung, u Novak u la lah ban pynliem noh ia u Casper Ruud ha baroh shi lynter jong ki ‘set’ iakhun na ka bynta ban khur shalade ia ka rekod ba Grand Slam ba 23. Kumta ruh ha ka tei ka jingjop ka jong u, u la lah mynta ban tam noh shakhmat ia u Carlos Alcaraz uba la bat baroh shi katta ia katei ka kyrdan haduh kaba sdang jong katei ka lympung ialehkai ba dang shu dep long ha Roland Garros.
Nalor jong u Novak, uwei pat u khlur ialehkai na Russia u Karen Khachanov u lah ioh mynta ban wanphai biang sha ka thup ba10 ha katei ka thup kyrdan jong ka ATP. Shuh shuh ruh u Novak mynta u lah nang iai bteng ha ka ban iai pynjlan shuh shuh ia ka jingtam jingjop jong u shakhmat ha kum kitei ki lympung ialehkai kiba heh da kaba khur ia ka jingjop na ka ha une u snem ba mynta, na ka bynta ban long u rangialehkai ba nyngkong ban lah khur ia ka trophy jingjop ha baroh ki saw lympung ialehkai kiba heh kata ha ka Wimbledon, US Open, French Open, Australian Open la kumno kumno lai sien kynthih.
Ha ka jingiamareh thong mynta na ka bynta ban khur ia ki khusnam kiba heh kaba kynthup ia ki trophy jingjop jong ka Grand Slam, takma Ksiar na ka jingiakhun paramarwei ha ka Olympic, ka Nitto ATP Finals bad ki lympung ialehkai ka ATP Masters 1000, u Djokovic u lah niat ialade kham shakhmat shuh shuh pyrshah ia ki nongialehkai kiba ju iakhun pyrshah bad u ha katei ka jngiamareh thong kata u Rafael Nadal bad Roger Federer.
U Novak u bat ruh ia ka rekod na ka bynta ka jingjop ha kiba bun ki lympung ialehkai kiba pawkhmat ha ka jinglah khur jingjop ka jong u kata ka rekod shimet kaba lah kot sha ka 23, ki jingjop phainal ha ki lympug ialehkai ka ATP (6 sien iaryngkat bad u Federer); bad ki jingjop ha ka Masters 1000 (38 sien jop marwei bad ha kaba mynta u don ia ki 67 tylli ki jingjop bakhraw pyrshah ia ki 59 u Nadal bad 54 jong u Federer. U long ruh u rangialehkai uba iaid mynta la mar shiteng na ka bynta ban long u rangialehkai Tennis ba nyngkong naduh u Rod Laver ha u snem 1969 ban pyndep pura ia ka jingkhur jingjop Grand Slam da kaba khur ia ki jingjop ha baroh ki saw lympung ialehkai ba pawkhmat ha kajuh ka aiom ialehkai.