Patna, Nailar:
Ka seng Congress ka la nang khlaiñ shuh shuh hadien ba u heh nongïalam jong ka seng BJP u Vinod Sharma u la leit ban pynïasoh bad ka seng ha ryngkat ka jingdonlang jong u President ka seng ha ka jylla u Akhilesh Prasad Singh bad kiwei pat ki heh nongïalam jong ka seng ha Sadaqat Ashram ha ka sngi Ba-ar.
U Sharma, uba long u heh nongaiktien jong ka seng BJP bad u dkhot jong ka Executive Committee, u la iehnohkam na ka seng BJP ha u bnai ba la lah ha kaba u la kynnoh ba ka sorkar kmie kam shym la lah ban leh ei ei ha kaba ïadei bad ki jingïakynad kiba la jia ha Manipur.
U Sharma u la kynthoh jur ïa u Myntri Rangbahduh u Narendra Modi halor ki jingïakynad ha Manipur.
Ha ka jingai jingkren ha ka ‘Milan Samaroh’ ka prokram ba la pynlong ha ka jaka treikam jong ka seng, u heh nongïalam jong ka seng Congress ha ka jylla u Singh u la pynshisha da kaba ong ba ki la don bun ngut ki riewsaiñ pyrthei jong ka seng BJP kiba la sngewktah bad sngewïahap bad u bad kine ki la pynpaw ba ki la kwah ban leit pynïasoh bad ka seng Congress.
“Nga dang ap na ka bynta ka jingbthah jong ki heh nongïalam ha kaba ïadei bad kane ka bynta,” u la bynrap.
U la ong ba ka jingwan pynïasoh jong u Vinod Sharma hapoh ka seng kan sa nang pynkhlaiñ shuh shuh ha kaba ïadei bad ki rukom pyntreikam jong ki nongbud jong ka.
“U la long uba la tbit bha ha ki kam saiñ hima-sima bad ka seng ka la ïoh jingmyntoi shibun na kane ka jingpynïasoh jong u. Kan sa ïarap shibun eh ïa ki jingtreikam jong ka seng ha ki ilekshon ban wan,” la ong u President jong ka seng hapoh ka jylla.
