La nang bun ki kali ilektrik kiba treikam ha Delhi, da kaba pyllait sa 100 tylli

New Delhi, Naiwieng: Kumba la sakhi na ki jingpyntreikam ïa ki bos ilektrik ha kylleng ka nongbah Delhi, ki bor ba dei khmih ki la pynpaw ba ka la don ka jingmyntoi shi katdei ïa...

New Delhi, Naiwieng:

Kumba la sakhi na ki jingpyntreikam ïa ki bos ilektrik ha kylleng ka nongbah Delhi, ki bor ba dei khmih ki la pynpaw ba ka la don ka jingmyntoi shi katdei ïa ki nongshong shnong khamtam ha kaba ïadei bad ka roi ka par ha ka thaiñ bad kumjuh ka jingkhuid jingsuba kumba la angnud hashwa ban wanrah ïa ka jingtreikam jong kine ki bos.

Ka Myntri Rangbah ka Delhi, ka Rekha Gupta, ha ka sngi Thohdieng, ka la pynlait paidbah ïa ki 100 tylli ki bos ilektrik kiba thymmai bad kaba pynlong ïa ka jingdon jong ki bos baroh sha palat 7,000 tylli ha ka nongbah jong ka ri.

Ïa kane ka kynhun kaba thymmai, kaba kynthup ïa 50 tylli ki kali ba khyndai meter bad kumba 12 meter, la plie paidbah da ka Myntri Rangbah ka jylla na ISBT Kashmere Gate.

“Ha kane ka aïom, haba ïakren ïa ka jingjaboh, ka sorkar jong ngi ka ïai bteng ban shim ïa ka jingkitkhlieh bad pyntreikam ïa ki bos. Kine ki bos kin ym ai tang ïa ka leit ka wan bad ka jingshngaiñ ïa ki nongleit nongwan jong ngi hynrei kin pynbha ruh ïa ka mariang jong ngi”, la ong ka Gupta ha ki nongthoh khubor.

Ka la ong ba ka sorkar ka la wanrah ïa ka polisi EV kaba heh bha kaba shongdor 15 hajar klur, kaba heh tam kum kane ka polisi ha ka ri, sha Delhi.

U myntri rangbah u la ong ba ka sorkar ka ai ruh ïa ki jingïarap bad ai jingkyrshan ban pynduh pyndam.

Hapoh ka polisi EV jong ka Delhi, ka sorkar ka ai jingïarap ban thied ha kylleng ki jait kali bad lah ruh ban dawa jingkyrshan na ka bynta ban pynduh noh ïa ki kali BS-IV lane kiba la rim ha ka jaka ba la pynrung kyrteng ha Delhi.

Haba kren shaphang ka jinglong ka suiñbneng, ka la ong ba hapoh u bnai Naiwieng ka AQI ka la nang kiew beit, kaba dei “ka jingmih na baroh ar ki paidbah bad ka sorkar kiba pyndep ïa ka jingkitkhlieh jong ki markylliang ïa ka mariang.”

Hadien ka jingpynrung ïa ki 100 tylli ki bos, ka jingdon jong ki bos baroh jong ka Delhi kan poi sha ka 7,088 tylli, kaba kynthup ïa 5,338 tylli ki bos elektrik bad 1,750 tylli ki bos CNG, kaba pynskhem shuh shuh ïa ka kyrdan jong ka kum ka nongbah kaba don ïa ki bos elektrik kiba heh tam ha ka ri.

U Myntri ka tnad ka leit ka wan u Pankaj Kumar Singh u la ong ba ka jingpynrung ïa ki 100 tylli ki bos ilektrik thymmai ka pyni ïa ka jingangnud ba skhem jong ka sorkar Delhi ban pynkylla ïa ka rukom kit paidbah jong ka nongbah lyngba ki lad ki lynti kiba lah ban pynneh pynsah ïa ka jingïaid lynti.