New Delhi, Naiwieng:
Kum ka jingshah pynphaidien kaba khraw ïa ka sorkar Tamil Nadu, ka SC ka kyntait ïa ka jingkyrpad jong ka jylla kaba pan jingbthah sha ka Karnataka ban pyllait kumba 11 TMC ka um jong ka wah Cauvery ban pyndap ïa ka jingduna.
Ka Apex court kaba don arngut ki nongbishar kaba la khlieh da u Justice Vikram Nath bad kaba kynthup ruh ïa u Justice Aparesh Singh ka la pynbna ïa ka rai ha ka sngi Thohdieng ha ka ïingbishar kaba plie ha ka por kumba 10.30 baje mynstep halor ka jingkyrpad ba la mudui da ka sorkar Tamil Nadu ha kaba pan jingbthah sha Karnataka ban pyllait noh ïa ka um kaba 11 TMC ha ka wah Cauvery.
“Ki la don ar tylli ki aplikeshon. Ha ka aplikeshon 2843, ngi la weng noh. Bad ka 46291 ruh ka la weng noh. Bad mynta ka sngi ruh ngin weng noh ïa ka aplikeshon kaba lai kaba la mudui,” la ong ka ben jong ka ïingbishar ba hakhliehduh.
U Justice Nath haba pynbna ïa ka rai u la buh jingkylli ïa ka sorkar TN ba phi la thep biang ïa ka application mynta ka sngi? “Ka Jylla Tamil Nadu ka don shibun ka pisa,” la ong u Justice Nath bad bynrap ba ka aplikeshon kaba lai ka dang sahteng mynta ka sngi.
Ka sorkar TN ha ka jingkyrpad kaba la mudui hakhmat ka ïingbishar ba hakhliehduh ka la kynnoh ba ka Karnataka kam shym la lah ban pyllait ïa ka um Cauvery kaba dei ban leit sha ka Tamil Nadu mynta u snem, kaba pynkheiñ ïa ka rai jong ka ïingbishar ba hakhliehduh.
Ka Tamil Nadu ka la pynpaw ïa ka jingpyrshah, da kaba kdew ba watla ka Cauvery Water Management Authority (CWMA) bad ka Cauvery Water Regulation Committee (CWRC) ki ïakynduh man la ka 15 sngi ban pynmih ïa ki jingbthah halor ka jingïasam um, hynrei kim shym la bthah ban pyllait ïa ka um kaba dang sah ba la pan da ka Karnataka sha Tamil Nadu.
Kumta, ka Tamil Nadu ka la leit sha ka ïingbishar ba hakhlieh duh, da kaba pan ïa ki jingbthah kiba biang ha kane ka bynta bad pan hukum ban pyllait noh ïa kane ka um kaba dang sah.
Ha kane ka jingbishar, u Senior Advocate Mukul Rohatgi, uba la mih na ka liang jong ka sorkar Tamil Nadu, u la kynthoh ba mynta u snem, u dei u snem uba sngewsih ha kaba u slap um biang. Namar ba ka Karnataka kam shym la pyllait um na ka wah Cauvery kumba la bthah ka SC, ki jingthung jingtep ki shah ktah. Ka CWMA bad ka CWRC ki ïakynduh man la ka ar taïew ban rai haduh katno ka um ka Karnataka ka dei ban pyllait sha Tamil Nadu na ka bynta ar taïew. Hynrei kim shym la ai hukum ban pyllait ïa ka um kaba dang sah kaba ka Karnataka ka dei ban ai sha ka Tamil Nadu.
Naduh u bnai Naitung, ka Karnataka ka don ram ïa ka Tamil Nadu haduh 11 TMC ïa ka um. Ka long kaba donkam ia ka Karnataka ban pyllait ia kane ka um ban iada ia ki jingthung jingtep.
Ban pyndap ia kane ka um kaba dang sah, ka Karnataka ka dei ban pynmih sa 11 TMC ka um ha ka shisngi.
Katkum ka rai jong ka Supreme Court, ha ka snem kaba thikna, ka Karnataka ka dei ban pyllait 177 TMC ka um sha ka jylla Tamil Nadu ha ka shisnem. Lada ka dei ka snem kaba duk bad khlem slap, te katto katne percent yn pynduna bad yn pyllait ïa ka um katkum ka jinglong.
Mynta u snem u la long u snem uba sngewsih bad wat hadien ba la pynduna ïa ka jingdon um, ka Karnataka ka dang don ram ïa ka Tamil Nadu haduh 11 TMC ka um. Lada ka Karnataka kam pyllait ïa kane ka um, ki jingthung jingtep ha Tamil Nadu ki shah pynjulor, la kynthoh u TN.
Na ka liang jong u Advocate Shyam Divan, uba mih na ka bynta ka Karnataka, u la pynpaw ba kane ka dei ka snem kaba rkhiang, ha kaba katto katne tylli ki distrik jong ka jylla, ki don ha ka jingshah teh mraw; kumta, la pynduna ïa ka jingai um na ka bynta ka jingpynlang um.
U la kynthoh ba katba ka Tamil Nadu ka ieng ban ioh jingmyntoi na ka jinghap slap ka ban sa wan, ka Karnataka kam ïoh jingmyntoi ei ei na ka. Shuh shuh, namar ba ka CWMA bad ka Regulation Committee ki ïakynduh man la ka 15 sngi ban pynmih ïa ki hukum, kam donkam shuh ïa ka ïingbishar ban tuklar halor kane ka kam; namar kata, ka jingdawa jong ka Tamil Nadu ka dei ban shah.
Ha kajuh ka por, u nongïasaid aiñ jong ka DMK, u P. Wilson, u la mih bad kyrpad ïa ki nongbishar, ba kin ailad ïa u, ba un wanrah ïa ki katto katne ki jingkynthoh, da kaba pynpaw ba u mih na ka liang jong ki nongrep. Hynrei ki nongbishar ki la pynpaw shai ba namar ba baroh ar tylli ki sorkar jylla ki la ïakren lypa ha katei ka mukotduma, kim lah ban ailad ban ïakren shuh.