New Delhi, Nailar:
Kum shi bynta ban rakhe ïa ka jingïadei ki shipara ha ka jingrakhe ïa ka ‘Raksha Bandhan’, ki khynnah skul kynthei ki la teh da ki ‘Rakhi’ ïa u Myntri Rangbahduh u Narendra Modi ha ka skul jong ki kaba don ha New Delhi.
Kine ki khynnah skul ki la ai khublei sha u Myntri Rangbahduh da ka jingphuh samrhie haba u la rung ha ka kamra klas jong ki bad teh da ki jingteh ksang kti ba ki la ñiew kyntang ïa u.
Haba kine ki khynnah ki la leit ban teh ïa kine ki jingteh ha ka kti, u Modi u la phai sha ki da ka khmat phuh samrkhie, ha kaba u la kylli bniah ïa ki kyrteng bad ki klas ba ki pule. Ha kane ka sngi kine ki khynnah ki la dap da ka jingkmen ban ïoh ka lad ban don ryngkat bad u Myntri Rangbahduh ka ri ha kaba u la ai por na ka bynta ban leit ïakynduh ïa ki kum ha kane ka sngi kaba kyrpang.
Ha kane ka sngi, u Myntri Rangbahduh u la ïashondurlang ruh bad kine ki khynnah skul bad kumjuh bad ki nonghikai. Ha kum kane kajuh ka sngi, ki khynnah skul kynthei ha Udhampur distrik kaba don ha Jammu & Kashmir ki la pyndeng da ki Rakhi ïa ki CRPF. Ha Samba distrik ki shipai BSF ki la rakhe ïa ka Raksha Bandhan bad ki khynnah skul.
