Dang bteng ka jingïoh jingmudui halor ka jingjah jong ki phone ha ki jaka treikam ki pulit

Kiba bun na ki nongshong shnong na kylleng ki jaka ki la leit ban buh jingujor ha kiba bun ki jaka treikam jong ki pulit namar ka jingjah jong ki phone jong ki.

New Delhi, Nailar:

Kiba bun na ki nongshong shnong na kylleng ki jaka ki la leit ban buh jingujor ha kiba bun ki jaka treikam jong ki pulit namar ka jingjah jong ki phone jong ki. Ka nongbah kaba kham jur bha ha kaba ïadei bad ka jingbuh jingujor ka la long ha Noida, ha kaba ki nongshong shnong ba bun ki la leit sha ki jaka treikam jong ki pulit ban buh jingujor halor ka jingjah jong ki Phone jong ki.

Kiba kum kine ki jingjia ki la ïai jia naduh ki khyndiat snem ba la leit ha kaba ki pulit ki la ïaleh katba lah ban buddien halor ki runar kiba ju donkti ban leh ïa kum kine ki jait kam ban tuh bad rah ïa ki Phone jong kiwei pat. Ki nongshong shnong kiba la jah Phone haba ki leit sha ki pulit ki ju buh ka jingkyrpad ba kin ïaleh shitom ha ka ban pynïoh biang ïa ki,  la ïathuh ki heh pulit.

U heh pulit u la ong ba ki la don ki jingmudui ha kaba ïadei bad kine ki phone bajah ïa kiba la ïoh ban pdiang ha ki 9 tylli ki jaka treikam jong ki pulit ka Noida ha Gautam Buddh Nagar distrik jong ka Uttar Pradesh naduh u snem ba la lah. “Kumba ka long mynta, ngi la antad ba ki la don kumba 5,000 tylli ki Mobile Phone ïa kiba la jah ha Noida,” la ong u Additional Deputy Commissioner of Police (Noida) u Shakti Mohan Avasthy. Kine ki la long ki jingjia kiba dang mynta shen bad kynthup lang ïa kiba la slem ha kaba haduh mynta ym pat lap ïa ki, la ïathuh u heh pulit. Ka jingpyntreikam na ka bynta ban ïohbiang ïa ki phone ba la jah ka dang ïai bteng bad ki pulit ki la trei shitom katba lah na ka bynta ban ïoh biang ïa ki, la bynrap u heh pulit.

U  Avasthyu la ong ba ki jingmudui ha kaba ïadei bad ki jingshahtuh bad ki jingshah knieh jong ki phone ki la bun bha ban ïa kiba shu jah ne bakla ban buh, hynrei la ong ba ïa kine ki phone la lah ban pyndonkam bakla da ki runar na ka bynta kino kino ki kam sniew jong ki. “Lada jia ha kine ki khep ba ki briew ki shu bakla buh ïa ki la dei ban shim ïa ka por bad ban wad shwa ïa ki bad hadien ba ki la tikna ba ki Phone jong ki ki la jah kin sa leit ban ai jingtip sha ki pulit,” la ong u heh IPS.