Bengaluru, Nailur:
Ka seng BJP bad ka seng JD(S) ki la pynskhem ïa ka jingïadei hapdeng jong ki ban ïatreilang na ka bynta ka ilekshon Lok Sabha 2024 ha Karnataka. U nongïalam jong ka seng BKP bad u Myntri Rangbah barim jong ka jylla u BS Yediyurappa u la pynshisha halor kane ka rai hynnin ka sngi.
Ka jingïamynjur ka long na ka bynta ban ïatreilang ha ki saw tylli ki konstitwensi, la ong u Yediyurappa ha kaba u la bynrap shuh shuh da kaba ong ba u Amit Shah u la mynjur ban ai ïa saw tylli ki Lok Sabha konstitwensi sha ka seng JD(S).
U heh nongïalam jong ka seng JD(S) u HD Deve Gowda dang shen u la ïakynduh ïa u heh nongïalam jong ka seng BJP u JP Nadda bad ïa u Myntri ka sorkar kmie uba dei khmih ïa ka tnat ki kam pohïing u Amit Shah bad na ka jingïalang la ong ba ka seng BJP bad ka seng JD(S) kin sa ïatreilang bad kaba mynta ka long sa tang ban ïathuh bniah halor kiei kiei kiba dang sah.
Ka seng JD(S) ka la ïatreilang bad ka seng Congress bad thaw sorkar bad u HD Kumaraswamy u la long u Myntri Rangbah.
Ka sorkar ka la khyllem noh hadien ba ka la duh ka jingkyrshan ha ka jingïapynibor ha u snem 2019, shi snem hadien ba ka la wan ha ka bor synshar.
Kumba la ïathuh ka tyllong khubor, la ong ba ka seng JDS ka la kwah ban ïakhun na Mandya, Hassan, Tumakuru, Chickballapur bad Bengaluru Rural.
Na ka liang ka seng BJP ka la mynjur ban ailad ba kan ïakhun na ki saw tylli ki konstitwensi kata na Kolar, Hassan, Mandya bad Bengaluru rural.
