New Delhi, Nailur:
U Myntri Rangbahduh ka India, u Narendra Modi ha ka Sngi Saitjaiñ u la ong ba ka pyrthei baroh kawei ka dei ban ialeh ban tehlakam ia ki kam thombor jong ki lehnoh bad ban rat dyngkhong ruh ia ki kam thombor kiba ap jingma ia ki ri jong ka pyrthei. Kumjuh ruh u la ong ba ka Bharat (India) kan pyrshang bad iakhun shitom ban rat dyngkhong noh ia baroh ki kam thombor ki lehnoh hapoh ka ri da kumno-kumno hapoh jong u snem 2047 baroh ki kam thombor bad baroh ki lehnoh ki dei ban duh jait lut ha India.
U Modi u la kren ia kane katba u dang ai jingkren ha ka International Lawyer’s Conference 2023 kaba la pynlong ha Vigyan Bhawan ha katei ka sngi.
Kumta ruh u la iathuh ba ka sorkar kan thaw lad- thaw lynti ban wanrah ia ki jingwad jingtip kiba kham bniah bad ba kham janai ban iada ia ka ri na kino- kino ki kam thombor jong ki lehnoh khamtam ruh haba iadei bad ka kam dawa pisa jong ki lehnoh.
U Modi u la ong ruh ba ka Bharat (India) ka la dap 75 snem mynta naduh ba ka la ioh ia ka jinglaitluid na ka kti ki phareng. Kumta, ka pyrthei baroh kawei ruh ka ngeit ba ka Bharat ka don shisha ia ka bor ban leh ia kiei- kiei kiba ka la thmu bad buh thong ban pynurlong.
