Gandhinagar, Nailur:
Ka Gujarat ka la ïoh ïa ka jinghap slap kaba palat 101 percent ha kane ka aïom Lyiur kaba mynta. Kumta, kumba la sakhi, la ong ba kane ka aïom Lyiur kaba mynta ka la long kaba biang eh ha kaba ïadei bad ka jingïohpdiang ïa u slap. Ka Indian Meteorological Department(IMD) kumba ka la buh jingkheiñ ka la ong ba ki la don kumba lai tylli ki distrik jong Gujarat kiba dang don hapdeng ka jingshlei um. Kine ki lai tylli ki distrik, ki la shah kdew da ki dak saw ha kaba kumba la sakhi, la ong ba kine ki kynthup ïa ka Ahmedabad, Gandhinagar, bad Vadodara. Ki la don palat 12,000 ngut ki briew ki la hap ban sah ha ki jaka sah ba shipor ba la pynbiang na ka bynta jong ki bad ha ki jaka ba kham shngaiñ namar ka jinghap jong u slap uba jur ha kaba kane ka la wanrah ïa ka jingshlei um ha kiba bun ki distrik jong ka Gujarat naduh ka 18 tarik, Nailur.
Ka jingïai bteng jong ka jinghap jong u slap ka la wanrah ïa ka jingshlei jong ka Narmada Dam bad jong ki 9 tylli ki jaka den um ha ka sien kaba ar, kaba la long naduh ka lah sngi U Blei jong ka taïew ba la lah.
Kum ka jingpyntreikam halor kane, ki heh ba dei khmih ki la pyntreikam ïa ka kynhun jong ka National Disaster Response Force (NDRF) bad bteng ha ka ban pyllait im ïa ki nongshong shnong na ki jaka ba la shah ktah na ka jingshlei um.
Ha ka jingthoh ba la phah, la ong ba ka kaiphot ba la phah da ka sorkar ka la antad ba ki la don kumba 11,900 ngut ki briew kiba shong basah ha ki thaiñ kiba long them kynthup ha Vadodara, Bharuch, Narmada, Dahod, Panchmahal, Anand, bad Gandhinagar ki la shah pynkynriah jaka sha ki jaka sah ba shipor.
Ha kine ki jaka sah ba shipor, ki heh sorkar ki la pynbiang nadong shadong, kynthup ha kaba ïadei bad ka jingbam bad kumjuh ki lad ai jingsumar.
U Myntri Rangbah jong ka jylla u Patel Bhupendrabhai Rajnikant, ha ka jingthoh ba la phah, u la pynbna da kaba ong ba ka la don ka jingïatreilang hapdeng ki District Collector ha ki distrik kiba la shah ktah jur ha kaba la don ka jinghap jong u slap uba jur.
Kumba ka long mynta, la ong ba ki la don kumba 10 kynhuh ki pulit jong ka NDRF bad State Disaster Response Force (SDRF) kiba la don bynta ha ka ban leit ai jingïarap bad pyllait im ïa ki briew na kiba bun ki shnong.
