Bhubaneswar, Risaw:
Saw bnai hadien ka jingtakhuh jong ki lai tylli ki rel kaba la shim ïa ka jingim jong ki 297 tylli ki mynsiem briew ha Balasore distrik kaba don ha Odisha, ki heh jong ka Bhubaneswar Municipal Corporation (BMC) ki la sdang ban pyntreikam ha ka ban pynkhuid noh ïa ki 28 tylli ki metïap ki bym shym la lah ban ithuh ne don nongwan kam.
U heh jong ka kynhun Civic Body ki la thmu ban pynkhuid noh ïa kine ki metïap naba ym shym la don ban leit kam ïa ki, u la ong.
“Ngi la pynmih ïa ki hukum ban pynkhuid noh ïa kine ki metïap jong ki briew kiba la ïap ha ka jingjia ïatakhuh jong ki rel katkum ka jingpyntreikam ha kane ka juk mynta. Ïa kine ki metïap la pynbeit ban aiti sha ka Corporation ha ryngkat ka jingdon ryngkat jong ki heh ka kynhun CBI bad ngi la thmu ban leh ïa kane ka kam ha ka sngi Ba-ar,” la ong u Mayor jong ka BMC u Sulochana Das ha ka jingïakren bad ki nongthoh khubor.
Ka tyllong khubor ka la ong ba ka BMC ka la ïakren halor kane ka bynta hadien ba ki heh jong ka kynhun Central Bureau of Investigation (CBI), kiba la don bynta ban tohkit halor ka jingjia jong ka jingïatakhuh jong ki rel, ki la phah shithi sha u Collector jong ka Khurda distrik, ha kaba ki la kyrpad ïa u ba la dei ban pynkhuid noh ïa kine ki metïap katkum ka ka jingstad saïan.
Ïa kine ki metïap la buh ha ka AIIMS Bhubaneswar naduh ba la jia ka jingjia aksiden.
Ka BMC kan sa pynbeit ïa ki jingdonkam baroh ha kaba ïadei bad ka jingkit ïa kine ki metïap na AIIMS sha ka jaka ban pynkhuid ïa ki kaba don ha Satyanagar bad ha Bharatpur ha ka nongbah, la ong sa uwei pat u heh jong ka kynhun.
U Director jong ka AIIMS ha Bhubaneswar kan sa aiti ïa kine ki metïap sha u heh ba dei khmih ha ka liang ka koit ka khiah jong ka BMC hadien ba la bud ïa ki kyndon ba la buh da ka sorkar jylla, ka sorkar kmie bad ka National Human Rights Commission na ka bynta ban pynkhuid noh ïa kine ki metïap, u la ong.
Ka jingpyntreikam ha kaba ïadei bad ka jingpynkhuid ïa kine ki metïap kan sa long ha ryngkat ka jingring dur, kane ka long shi bynta katkum ka kyndon ba la buh jong ka BMC.
