Srinagar, Naiwieng:
U Head Constable jong ka tnat BSF u Lal Fam Kima, uba la ïap na ka jingsiat jong u Sniper ka Pakistan ha ki bynta jong u International Border ha Jammu ha ka sngi Palei, u dei u shipai uba shlur bad u la pyllait im ïa palat shiphew ngut ki para shipai ha ka por ba la don ka jingïasiat kaba mar kylliang bad ki lehnoh ha ki bynta jong u LoC ha Jammu & Kashmir. U Kima hashwa ba un ïap u la kawang da u bom kawang kti ha ka jaka ba la pynlong jaka rieh ki lehnoh kaba la long ha kawei ka ïing ba la subor da ka ‘dewbyrtha, ha kaba la shem ba ki la don lai ngut ki lehnoh kiba la ïap. Une u shipai u dei u nongshong shnong jong ka nongbah Aizawl, u la leit ban pynïasoh bad ka kynhun shipai ha u snem 1996 bad u la shah pyntreikam mynta bad ka kynhun 148th BSF Battalion.
Kane ka jingshah pynïap u shipai ka la long na ka jingpynkheiñ aiñ sangeh ïasiat jong ki shipai ka Pakistan ha ki bynta jong ka International Border ha Ramgarh Sector jong ka Sambha distrik ha Jammu & Kashmir.
Kane ka jingjia ka la jia ha ka por shiteng synñia jong ka 8 bad 9 tarik, Naiwieng, ha kaba ka jingsiat jong ki shipai Pakistan ka la pynlong ïa ki shipai ka tnat BSF ba kin pynphai kylla ïa ka jingsiat ha ka thaiñ.
“Ha ka miet shiteng synñia jong ka 8 bad 9 tarik, Naiwieng, 2023, ki shipai Pakistan ki la siat khlem sangeh ha ka thaiñ Ramgarh ha kaba nangne ki shipai BSF ki la pynphai kylla,” la ong ka jingthoh kaba la wan na ka tnat shipai BSF. Uwei u shipai BSF u la mynsaw na ka jingdei kuli ha kaba hadien kane la pynkit mar mar ïa u sha ka jaka ai jingsumar kaba marjan na ka bynta ban phah sumar.
U Dr Lakhwinder Singh uba long u Block Medical Officer (BMO) jong ka Ramgarh Community Health Centre u la ong ba uwei u shipai BSF u la mynsaw na ka ka jingshah siat ha ki shipai ka Pakistan bad kumba la ïoh jingtip la ong ba la phah ïa u sha ka jaka ai jingsumar ha ka por 1 baje mynstep, la ïathuh ka tyllong khubor. Hadien kane la pynkynriah noh ïa u sha GMC Hospital kaba don ha Jammu hynrei u la khlad noh hapdeng ka jingshah sumar na ka daw ba jur palat ki jingmynsaw.
Ka jingsiat da ki shipai Pakistan ka la pyntieng pynsyier ïa ki nongshong shnong kiba ha ka thaiñ Ramgarh, ha kaba hadien kane ki la phet noh sha ki ïing krem ba la buh kyrpang na ka bynta jong ki ban lait na ka jingdei kuli. Kane ka dei ka sien kaba lai ha kaba ki shipai Pakistan ki la pynkheiñ ïa ka aiñ sangeh ïasiat ha ki 24 sngi ha ki bynta jong ka IB ha ka thaiñ Jammu bad kaba hynriew halor baroh ka jingpynkheiñ aiñ kaba la long naduh ba la don ka jingïasoi sangeh ïaisat ha ka 25 tarik, Rymphang, 2021.
Ha ka 28 tarik, Risaw, ki shipai Pakistan ki la pynjur ïa ka jingsiat bad ther da ki Shell da kumba 7 kynta, ha kaba kane ka la pynmynsaw ïa arngut ki shipai BSF bad kawei ka longkmie.
Ha ka 17 tarik, Risaw, arngut ki shipai BSF ki la mynsaw ha ka jingsiat kaba khlem sangeh jong ki shipai Pakistan ha Arnia Sector.
Ki shipai BSF ki la pynpaw ka jingpyrshah jur ïa ki shipai ka Pakistan ha ka por ba la don ki jingïalang jong ki heh shipai ha kaba ïadei bad ka jingdon jong ar tylli ki jingsiat kiba jur ba la jia ha ki bynta khappud.
