New Delhi, Naiwieng:
K0a National Investigation Agency (NIA) ha ka sngi Balang ka la pynlong ïa ka jingleit khynra ha baroh kawei ka ri bad kem ruh ïa 44 ngut ki runar kiba la donkti ha kaba ïadei bad ki kam khaïi briew.
Nalor kane, ki la don ruh sa kumba san tylli ki kynhun ba ju khaïi briew ki la shah pynpulom ïa ki rukom treikam jong ki ha kiba bun ki bynta jong ka ri.
Ha ka jingleit khynra jong ka NIA la ïasnohktilang bad ki shipai jong ka tnat Border Security Force (BSF) bad ki pulit jong ki jylla.
Kane ka jingpyntreikam ka long halor ka jingthmu ban ïakhun pyrshah halor ki kam bad ki kynhun ba ju khaïi briew kiba la don bynta ha ka ban pynrung tuh bad pynsah beaiñ ïa ki bar ri ha kylleng ki bynta jong ka khappud Indo-Bangladesh sha India.
Hadien ba la dep ban buh jingthoh ha kaba ïadei bad ki saw tylli ki jingjia jong ki kam khaïi briew ha ki tnat treikam jong ka kynhun NIA ha Guwahati, Chennai, Bangalore, Jaipur, kiba bun ki jingleit khynra ki la long sha 55 tylli ki jaka kiba don ha kiba bun ki jylla bad ki Union Territory.
Ïa ka jingleit khynra la pynlong ha Tripura, Assam, West Bengal, Karnataka, Tamil Nadu, Telangana, Haryana, Rajasthan bad ha ki Union Territory jong ka Jammu & Kashmir bad Puducherry, la ong u nongaiktien jong ka kynhun NIA.
