Hyderabad, Naiwieng:
Ka seng Congress jong ka Telangana ka la ong ba kan sa pynkiew ïa ka mang tyngka sha ka T. 4,000 klur manla u snem na ka bynta ban ïoh ai jingmyntoi sha ki kynhun ritpaid, nalor ka jingpynlong ïa ka jingwad khana samari halor ka jingdon jong ki kynhun jait bynriew hapoh ki hynriew bnai ynda ka la wan ha ka bor synshar, lada jia ba ka shahjied ha ka ilekshon Assembly ha ka 30 tarik, Naiwieng.
Ïa ka “Minority Declaration” la pyllait ha ka sngi Palei, ha kaba la ong ba la pyntikna na ka bynta ban mang ïa ka bhah na ka bynta baroh ki kynhun jait bynriew, kynthup ïa ki ritpaid na ka bynta ban ïoh kam, ki skhim ba ïadei bad ki jingpule bad kumjuh ki skhim sorkar. Shuh shuh ka seng Congress ka la kular ban pynïoh ka pisa kaba T. 1,000 klur shi sien-shi snem na ka bynta ban pynbiang ki jingkyrshan pisa sha kito ki samla jong ka kynhun ritpaid ki bym donkam-donjam bad sha ki longkmie. Hapoh ka jingtreikam jong ka skhim Abdul Kalam Taufa-e-Taleem Scheme, ka seng ka la ong ba kan sa pynbiang ka jingïarap pisa kaba T. 5 lak sha ki Muslim, Khristan, Sikh, bad kiwei pat ki samla jong ka kynhun ritpaid na ka bynta ban pyndep ïa ka jingpule ha ka M.Phil bad Ph.D, ka la ong. Katkum ka mat treikam ba la pyllait, la ong ba ka seng kan sa ai ruh ka jingïarap pisa ei kaba man u bnai ka ban long T. 10,000 haduh T. 12,000 na ka bynta ki nongïalam jong baroh ki niam kynthup ïa ki Lyngdoh, Imam, Muezzin, Khadim, Pastor bad ki Granthi.
Ka seng ka la kular ban wanrah ïa ka “Telangana Sikh Minority Finance Corporation” nalor ka jingpyntreikam ha ka ban pynrung kam ïa ki nonghikai Urdu. Ki kynhun ritpaid ki bym don ïing, kin sa ïoh ki jaka bad ka pisa kaba T. 5 lak na ka bynta ban shna ïing. Ki shijur kiba dang shu dep ïathoh na ki kynhun ritpaid kin sa ïoh jingïarap pisa da T. 1.6 lak.
