Kolkata, Rymphang:
U President ka State Congress Unit, u Adhir Ranjan Chowdhury u la ong ba ka kali u MP ka Congress, u Rahul Gandhi ka la shah pynjulor ha ka Sngi Balang katba ka kynhun jong u ka dang rung sha Malda distrik, West Bengal na Katihar, Bihar.
Haba kren sha ki lad pathai khubor, u Chowdhury u la ong ba u Gandhi kumjuh kiwei-kiwei kim shym la lei-lei ha katei ka jingjia.
U la ong, “Ngam tip mano ba la kawang maw hynrei u nongïalam jong ngi, u Rahul Gandhi u la mad jingeh na ki bor pynïaid ka Jylla naduh ba u la rung sha Cooch Behar na Assam ha ka 24 tarik u Kyllalyngkot,” ong utei u nongïalam ka Congress.
Ka ïit ba na shadien jong ka kali kaba la pyndonkam da u President barim ka Congress ka la julor lut.
Katkum ka dur khih, la ïohi ba u Gandhi u dang khmih bniah ïa ka kali ba la julor bad da ka jingjai-jai u la ïaid shakhmat ban ïakren bad ki nongshong shnong ka Harishchandrapur jong ka Malda distrik, West Bengal.
Ym shym la ïoh jingtip la u Gandhi u don ne em hapoh kali ha ka por ba shah kawang maw.
Ki dur khih ba la ïoh ring ki la pyni ruh ba utei u MP ka Wayanad u dang hiar na ka kali hadien ba la poi ha kawei ka jaka bad jurip ïa ka ïit ba la pait na shadien.
“Ka ïit ba na shadien jong ka kali kaba u Rahul Gandhi u shnong ka la julor hadien ba la shah kawang maw…kane ka bym lah pdiang satia,” ong u Chowdhury.
Ha kawei ka liang, ka Myntri Rangbah ka West Bengal, ka Mamata Banerjee ha ka sngi Balang haba pynrem jur ïa katei ka jingjia, ka la kam ba ka kali jong u MP ka Congress, u Rahul Gandhi ka la shah pynjulor ha Bihar bad ym ha West Bengal.
