Ranchi, Lber:
Hadien ba la phah shithi, kaba long halor ka jinglah ban pyllait jamin bad ka jingbym lah ban pyllait jamin, ka District Court ha Jharkhand ka la hukum ïa u President barim jong ka seng Congress u Rahul Gandhi ba un leit mih markhmat ha kaba ïadei bad ka mukotduma jong ka jingpynjah burom ïa kiwei pat ha u snem 2018 halor ka jingkren pyrshah jong u ïa ka seng BJP bad ïa u Myntri ka sorkar kmie uba dei khmih ïa ka tnat kam pohïing u Amit Shah.
U West Singhbhum Judicial Magistrate (First Class) u Rishi Kumar ha ka 14 tarik, Lber u la pdiang ïa ka hukum kaba la kyntait ïa ka jingkyrpad jamin u Gandhi uba la kwah ban leit mih hakhmat ka ïingbishar lyngba u nongïasaid aiñ jong u, ha kaba la ong: “Katkum ki kyndon…haba u Majistor u khot hajir, kata la donkam ban leit mih markhmat ka long da kaba khmih bniah ïa ki daw…hynrei ha kaba ïadei bad kane ka mukotduma ka shithi bym lah ban pyllait jamin la phah shabar jong ka jingtreikam kane ka kyndon jong ka 205 CrPC ha kaba uba la shah kynnoh u la dei ban leit mih markhmat.”
Ka ïingbishar ka la ïathuh shuh shuh da kaba ong ba u Gandhi u la phah ïa ka jingkyrpad ban ai biang da ka shithi maham bym lah ban pyllait jamin pyrshah ïa u.
