Jammu, ïaïong:
Uwei u runar u la shah siat ïap ha ka jingïasiat kaba markylliang bad ki pulit hajan Government Medical College (GMC) Hospital kaba don ha Kathua ha Jammu & Kashmir, la ïathuh u heh pulit hynnin ka sngi.
U Probationary Sub-Inspector (PSI) u Deepak Sharma, uba la shah pynmynsaw na ki bynta jong ka khlieh ha ka por ba la don ka jingïasiat, u la khlad noh ha ka por ba u dang shah sumar hynnin ka sngi ha Amandeep Hospital, Pathankot, la ïathuh u heh pulit, ha kaba u la bynrap shuh shuh da kaba ong ba u Special Police Officer ruh u la mynsaw.
Hadien ba la ïoh jingtip shaphang ka jingdon jong ki runar, ka kynhun jong ki pulit ka la leit ban thwet bad buddien ïa ki runar kiba kynthup ïa u Vasudev, uba long u snar nongïalam ha ka jingjia pynïap briew kaba la buh jingmudui ha ka jaka treikam jong ki pulit ka Ramgarh, ha kaba nangne ka la mih ka jingïasiat kaba markylliang hajan Government Medical College ha ka por 10.30 jong ka miet sngi ba-ar, la ïathuh ka nongai ktien jong ka tnat pulit.
U Vasudev u la shah pynïap ha ka por ba don ka jingïasiat kaba markylliang katba uwei pat u paralok jong u u la shah pynmynsaw, la bynrap ka nongaiktien.
Ha kaba nyngkong ïa kine baroh arngut ki pulit kiba la mynsaw la pynkit sha GMC Hospital kaba don ha Kathua bad hadien kane la pynkynriah noh sha Amandeep Hospital kaba don ha Pathankot, la ïathuh ka nongaiktien.
