Patna, ïaïong:
Uwei u samla ba la tip kyrteng kum u Saurabh Kumar bad uba dei ruh u nongïalam jong ka seng u Nitish Kumar ka Janata Dal-United (JDU) u la shah siat-ïap ha ka miet Sngi Balang katba u dang wanphai na ka jingkhawai ïathoh ha Patna, la ïathuh ki pulit.
Kumba la ïathuh ki pulit, la ong ba uwei pat u briew uba la synran lang ïa une u samla, u Munmun Kumar, u la mynsaw ha ka jingshah siat kaba la jia ha ka shnong Parsa Bazar village, la ong u R Singh, uba long u Police Station In-charge, ha Punpun.
U Saurabh u la shah siat arsien na ka khlieh jong u ha ki saw ngut ki runar ki bym shym la lah ban ithuh kiba la wan da ka kali arshaka katba u Munmun uba la synran ïa u u la shah siat lai sien.
Hadien ka jingshah siat ïa kine ki arngut la pynkit mar mar sha ka jaka ai jingsumar ha kaba ki doktor ki la pynbna ba u Saurabh u la khlad hashwa ban pynpoi ïa u sha ka jaka sumar katba u Munmun u dang shitom jur.
Ka kynhun jong ki pulit ka Patna ki la leit sha katei ka jaka ha katei ka miet bad ki la sdang ban pynlong ïa ka jingtohkit kaba bniah halor ka jingjia.
Ki nongshong shnong jong katei ka thaiñ kiba la dap da ka jingbitar ki la leit ban khang ïa ka surok bad pynlong ïa ka jingïakhih bajur ban pyrshah halor kane ka kam thombor.
