Srinagar, ïaïong:
Ki la don ar ngut ki shipai ka tnat Army kiba la mynsaw ha ka por ba la jia biang ka jingsiat ha ka jaka ba la don ka jingïasiat hapdeng ki lehnoh bad ki shipai ïada ri ha Sopore ha Jammu & Kashmir hynnin ka sngi ka sngi Thohdieng. Uwei u lehnoh u la ïap bad uwei u riewpaidbah u la mynsaw ha ka por ba la don ka jingïasiat kaba markylliang hadpeng ki shipai bad ki lehnoh, ha kaba kane ka dang ïai bteng haduh ba la thoh ïa ka khubor naduh ka sngi Palei.
Ka kynhun jong ki pulit bad ki shipai ka tnat Army ki la pynlong ïa ka jingleit thwet lehnoh ha Nowpora hadien ba ki la ïoh jingtip shaphang ka jingdon jong ki lehnoh ha ka thaiñ. Haba ka kynhun shipai ka la poi ha katei ka jaka, ki lehnoh kiba la ïoh jaka rieh lypa ki la siat sha ka phang ba don ki shipai, ha kaba nangne ka la mih ka jingïasiat kaba markylliang. U heh nongïalam jong ka kynhun lehnoh Lashkar-e-Taiba ha ryngkat u nongbud jong u la ngeit ba ki la shah kerkut ha kane ka thaiñ.
