Jammu, ïaïong:
Ki la don palat 50 tylli ki ïing kiba la julor, 4 tylli ki Electricity Tower ki la julor bad ka surok kaba dei u budlum ka la sniew namar ka jingngam jong ka khyndew ha Ramban distrik kaba don ha Jammu & Kashmir. Kane ka jingjia ka la jia ha ka shnong Pernote, kaba don ha ka jaka kaba jngai da kumba 5 km na ka District Headquarters.
U Deputy Commissioner u Baseer-ul-Haq Choudhary u la leit ban jurip bniah ïa katei ka thaiñ kaba la shah ktah jur ha ka step jong ka sngi Thohdieng.
Kane ka jingjia ka la sdang ban paw pyrthei ha ka janmiet jong ka sngi Palei haba ki la don kumba katto katne tylli ki ïing kiba la orpait, ka surok bah kaba pynïasoh hapdeng ka Ramban ka la kad namar ka jingngam ka khyndew ha ka shnong Pernote.
Kane ka jinglong jingman ka la pynlong ïa kiba bun ki longïing ha ka thaiñ ba kin phet shnong shwa sha ki jaka ba kham shngaiñ.
Kum shi bynta ban ai jubab halor kane ka jingjia, ki stad ba dei khmih halor ka jinglong jingman jong ka mariang ki la shah khot na ka bynta ka jingkylli jingkylli ban tip kham bniah halor ki daw ba don sha lyndet kiba la wanrah ïa kane ka jingngam jong ka khyndew, katba ïa ka kynhun ba la jied jong ki heh nongpynïaid distrik la pyntreikam na ka bynta ka jing-leit khmih bniah bad ka jingpyntreikam na ka bynta ban maramot halor kine ki jingjulor.
“Ka khyndew ka la nang ngam, hynrei ka jingkhmih bniah ka dang long kumno ban lah ban treikam halor ka jinglong jingman jong ka surok bad ka bording. Ïa mynta ngi la sam ïa ki dara bad kiwei pat ki jingdonkam na ka bynta ki lanot bad ka la don ruh ka jingai jingsumar sha ki,” la ong u Deputy Commissioner u Choudhary.
Ki nongïarap shnong, ha ryngkat ki shipai ka kynhun State Disaster Response Force (SDRF) bad ka National Disaster Response Force (NDRF), ki la shah jied na ka bynta ban ai jingïarap sha ki lanot kiba la shah ktah bad ban ïarap ha ka ban pynrah ïa ki tiar ki tar na ki ïing ba la julor sha ki jaka ba ki sah.
Kaba kum kane ka jingjia ka la jia ruh ha u bnai Rynphang jong u snem ba la lah ha kaba ki la don kumba 16 tylli ki ïing kiba la julor, ka surok ba la pynïasoh hapdeng Gool bad Ramban ka la shah pynjulor bun na ka daw ka jingngam jong ka khyndew ha ka thaiñ Sangaldan kaba don ha ka shnong Duksar Dalwa.
U Myntri ka sorkar kmie u Jitendra Singh u la pynpaw ka jingsngewlem halor kane ka jingjia, ha kaba u la pynbna ha kaba ïadei bad ka jingdon ki lad ai jingïarap kaba dang ïai bteng.
