New Delhi, ïaïong:
Ka seng AAP ka la pynshisha da kaba ong ba ki bor pynïaid jong ka patok ha Tihar ka la kyntait ban ai jingbit sha ka kurim jong u Myntri Rangbah ka Delhi u Arvind Kejriwal ka Sunita ban ïakynduh ïa u hynnin ka sngi.
Kumba la ïathuh ka tyllong khubor kaba la wan na ki heh nongpynïaid jong ka Tihar Jail la ong ba ki la dep ban ai jingbit ïa ka Myntri jong ka Delhi ka Atishi kaba la phah jingkyrpad ha ka taïew ba la lah ban leit ïakynduh ïa u Kejriwal ha ka 29 tarik, Ïaïong, katba ka jingkyrpad na ka liang jong ka Sunita ka la long ha ka step jong kane ka sngi.
“Ka Sunita ka la ïakynduh ïa u Kejriwal bad kam shym la don kano kano ka jingkylli ha kaba ïadei bad ka jingkyntait ban ai jingbit ïa ka. Ngi la bud ïa ki kyndon ba la buh bad ngi la pynkhreh bha ha kaba ïadei bad ka jingleit ïakynduh jong ka Atishi,” la ong ka tyllong khubor kaba la wan na ki bor pynïaid jong ka patok.
Ha kaba ïadei bad kane, ka tyllong khubor kaba la wan na ka seng AAP ka la kyntait halor katei ka jingpynshisha jong ki bor pynïaid jong ka Tihar Jail.
“Ïa ki kyrteng jong ka Sunita Kejriwal bad ka Atishi la phah sha ki bor pynïaid jong ka Tihar Jail ha ka 27 tarik, Ïaïong na ka bynta ban leit ïakynduh ïa u Myntri Rangbah kaba dei hynnin ka sngi ka 29 tarik, Ïaïong. Ki bor pynïaid jong ka patok ki la pynbna mynta ïa ngi ba kim shym la ailad ïa ka Sunita Kejriwal ba kan leit ban ïakynduh ïa u Kejriwal. Ki la ong ba kin sa ai jingbit tang ïa ka Atishi,” la ong ka tyllong khubor kaba la wan na ka seng.
Ha ka jingpyllait khubor lyngba ka rynsan phah khubor ha X, la ong ba, “Da ka hukum jong ka sorkar u Modi, ki bor pynïaid jong ka Tihar Jail ki la kyntait ban ai jingbit ïa ka Sunita Kejriwal ba kan leit ban ïakynduh ïa u kurim jong ka u Arvind Kejriwal. Ka sorkar u Modi ka la ïaid lait na kiba bun ki bynta jong ka jingbym kheiñ briew ïa kiwei.”
“Ka Sunita Kejriwal ka la dei ban ïakynduh ïa u Arvind ha ka lah sngi U Blei hynrei ki bor nongpynïaid jong ka Tihar jail ki la kyntait ban ai jingbit,” la ong ka seng.
