Ranchi, ïaïong:
Ka sorkar Uttarakhand ka la pynduh noh ïa kumba 14 tylli ki Licence jong ki 14 jait ki dawai bad ki jingdih ba la pynmih da ka Patanjali kumba la hukum naduh ka 15 tarik, Ïaïong. Ka la don ka jingmudui halor ka kam beaiñ ba la pynngat pyrshah ïa u Ramdev bad u Acharya Balkrishna bad ka Patanjali halor ka jingpynkheiñ jong ki ïa ka kyndon Drugs and Magic Remedies Act.
Ki dawai bad ki jingdih kiba hap hapoh ka jingtreikam jong ki Licence ba la shah pynduh, ki kynthup ïa ka dawai Swasari Gold, Swasari Vati, Bronchom, Swasari Pravahi, Swasari Avaleh, Mukta Vati Extra Power, Lipidom, Bp Grit, Madhugrit, Madhunashini Vati Extra Power, Livamrit Advance, Livogrit, Eyegrit Gold bad ka Patanjali Drishti Eye Drop.
Ka jingpyntreikam ka la long ha ka por ba ka la don ka jingbishar bniah jong ka Supreme Court pyrshah ïa u Ramdev bad ïa u Managing Director jong ka Patanjali u Balkrishna halor ka jingleh bym kohnguh ïa ki hukum jong ka ïingbishar ha kaba ka la pynlong ban khang ïa ka Patanjali Ayurved ban pynmih ïa ki jingpynbna kiba ïalam bakla halor ki jingpynkoit na ki jingshitom bad ai bor ïa ka met.
Ka ïingbishar bahakhliehduh ka la bishar bniah halor ka jingmudui ba la buh ha u snem 2022 da ka Indian Medical Association (IMA) halor ka jingkynnoh ba ka la don ka jingpynsngewthuh paidbah pyrshah ïa ka jingai dawai ïada Covid bad kiwei kiwei pat ki jait dawai ba mynta.
Ha u bnai ba la lah, ka ïingbishar ka la hukum ïa u Ramdev, ïa u nongïarap jong u u Acharya Balakrishnan bad ïa ka Patanjali Ayurved Ltd ba kin panmap paidbah halor ka jingbym bud jong ki ïa ki hukum ha kaba ïadei bad ka jingïalam bakla lyngba ki jingpynbna.
