Bhopal, ïaïong:
Ki pulit ha ka Lah Sngi U Blei ki la ïathuh ba ki bor pynïaid ha Raja Bhoj International Airport kaba don ha Bhopal, Madhya Pradesh ki la ïoh ïa ka khubor byrngem pynbthei bom na u nongphah bym shym lah ban ithuh. Hadien ba la ïoh pdiang ïa kane ka khubor byrngem, ka la don ka jingbuh jingmudui pyrshah ïa u briew u bym shym ithuh ha ka jaka treikam jong ki pulit ka Gandhi Nagar katkum ka jingmudui jong u Chief Security Officer, jong ka Airport u Vishal Kumar Sharma.
U Deputy Commissioner of Police (DCP, Zone 4) u Sundar Singh Kanesh lyngba ka Phone ha ka jingïakren bad ki nongthoh khubor, u la ong, “Ka bor pynïaid jong ka Airport ki la buh da ka jingmudui ha kaba ki la ong ba ki la ïoh ïa ka khubor shah byrngem pynbthei bom ïa ka Airport lyngba ka Email. Kumba la khmih bniah na ka Email la ong ba ïa u bom la buh ha kawei ka liengsuiñ, ha kaba la byrngem ban pynbthei ha ka jaka sangeh liengsuiñ.”
Kum shi bynta ban leh ei ei halor ka jingmudui, ki pulit ki la buh jingthoh halor ka jingjia bad pynlong ïa ka jingtohkit. Ki jingpyntreikam kin sa nang ïai bteng katkum ka jingkhmih bniah na kaei kaba la jia, u la bynrap. Ha kaba ïadei bad kane kajuh ka jingjia, ka Dabolim Airport ruh kaba don ha Goa ka la shah byrngem pynbthei bom lyngba ka Email ha ka lah sngi U Blei, ha kaba kane ka la pynlong ïa ki bor pahara ban pynkhlaiñ ïa ki jingtreikam ki jingpahara.
Ha kaba ïadei bad kane ka khubor la hap ban pynsangeh shipor ïa ka jingtreikam jong ki liengsuiñ. “Ngi la ïohpdiang ïa ka Email. Ngi la pynjur da ka jingpahara jong ki kynhun shipai ïada. Ngi la shim ïa ki sienjam na ka bynta ban leh ïa kaba donkam. Kumba ka long mynta, kam shym don shuh kano kano ka jingap jingma. Ki liengsuiñ ki la treikam kumba ju trei. Ngi la pyntreikam kumba ju pyntrei ïa ki kynhun pahara,” la ong u Director ka SVT jong ka Dabolim Airport u Dhanamjaya Rao.
