Patna, ïaïong:
Ka Rohini Acharya, kaba dei ka khun jong u Lalu Prasad bad ka kyrtong jong ka seng RJD, ka la phah ïa ka kot thep kyrteng na ka bynta ban ïakhun na Saran Lok Sabha konstitwensi ha Chapra distrik, kaba don ha Bihar.
U Lalu Prasad, ka Rabri Devi, u Tejashwi Yadav, Tej Pratap Yadav, bad ka Misa Bharti ki la don lang ha kane ka jingleit thep kyrteng, ha ryngkat ki paidbah ba bun kiba dei ki nongkyrshan jong ka seng.
Hadien ba la dep ban thep kyrteng, ka la don ka jingïalang paidbah ba la pynlong ha Rajendra Stadium kaba don ha Chapra, ha kaba la leit ban ïashim bynta da u Tejashwi Yadav, u heh ka seng VIP u Mukesh Sahani, bad u National General Secretary jong ka seng RJD u Abdul Bari Siddiqui, la ïathuh ka tyllong khubor.
Ka Rohini Acharya ka la ïakhun pyrshah ïa u heh nongïalam jong ka seng BJP u Rajiv Pratap Rudy, uba la jop ha ka jingïakhun na ka Lok Sabha konstitwensi ha ka ilekshon jong u snem 2014 bad 2019.
U Rudy u la kynthoh jur ïa u Lalu Prasad, ha kaba u la pynshisha da kaba ong ba ka Rohini Acharya ka la long tang ka nongmih khmat bad u Lalu Prasad Yadav u la long shisha u kyrtong jong ka Saran.
Ha kaba ïadei bad kane, u Symbud Myntri barim jong ka Bihar bad u nongïalam jong ka seng RJD u Tejashwi Yadav, ha ka por ba la don ka jingïalap ilekshon na ka bynta ka kyrtong jong ka seng na Saran ka Rohini Acharya, u la ong, “Ka Rohini Acharya kan ïakhun nangne. Nga tikna ba ka para jong nga kan sa lah ban leh kham bha ha Saran ka ban sa long ka ‘Karmabhoomi’ jong u kpa jong nga u Lalu Yadav. Ka jinglah jong ka ban aiti ïalade bad ailad ban pynim ïa u kpa, kan sa lah ban trei kham bha na ka bynta ki paidbah ha kajuh ka rukom. Ngi kwah ïa ki jingkyrkhu jong phi. U kpa jong nga u la trei bha shibun eh na ka bynta ka Saran.”Katkum ka jingpyllait khubor la ong ba ka Rohini Acharya ka la ong, “Ngan sa shakri ïaphi kumba nga shakri ïa ki kmie ki kpa jong nga.”
